യൂറോപ്യൻ യൂണിയൻ (EU) രാജ്യങ്ങളിലേക്കുള്ള സർവീസ് താൽക്കാലികമായി നിർത്തിയതായി കാനഡ പോസ്റ്റ് അറിയിച്ചു. യൂറോപ്യൻ യൂണിയനിൽ പുതുക്കിയ കസ്റ്റംസ് ഡ്യൂട്ടി നിലവിൽ വന്നതാണ് ഇതിനു കാരണമെന്ന് ഏജൻസി വ്യക്തമാക്കി. യൂറോപ്യൻ യൂണിയന് പുറത്തുനിന്ന് വരുന്നതും 150 യൂറോ (ഏകദേശം 240 കനേഡിയൻ ഡോളർ) വരെ മൂല്യമുള്ളതുമായ പാഴ്സലുകൾക്ക് ബുധനാഴ്ച മുതൽ മൂന്ന് യൂറോ കസ്റ്റംസ് ഡ്യൂട്ടി ചുമത്താൻ യൂറോപ്യൻ യൂണിയൻ തീരുമാനിച്ചിരുന്നു. പാഴ്സലുകളുടെയും മൂല്യം കുറച്ചു കാണിക്കുകയും നികുതി വെട്ടിക്കാൻ തെറ്റായ വിവരങ്ങൾ നൽകുകയും ചെയ്യുന്നതായി കണ്ടെത്തിയതിനെ തുടർന്നാണ് ഈ നടപടി.
ഓസ്ട്രിയ, ബെൽജിയം, ചെക്ക് റിപ്പബ്ലിക്, ഡെന്മാർക്ക്, ഫിൻലാൻഡ്, ഫ്രാൻസ്, ജർമ്മനി, അയർലൻഡ്, ഇറ്റലി, ലക്സംബർഗ്, പോർച്ചുഗൽ, സ്പെയിൻ എന്നീ രാജ്യങ്ങളിലേക്കുള്ള സർവീസ് ആണ് നിർത്തിവെച്ചിരിക്കുന്നത്. ഈ രാജ്യങ്ങളിലേക്കുള്ള കത്തുകളും പാഴ്സലുകളും ഇനിയൊരു അറിയിപ്പ് ഉണ്ടാകുന്നതുവരെ സ്വീകരിക്കില്ലെന്നും കാനഡ പോസ്റ്റ് വ്യക്തമാക്കി.
