സ്ഥിരതാമസം നേടാൻ ആഗ്രഹിക്കുന്ന ഫ്രഞ്ച് ഭാഷാ പ്രാവീണ്യമുള്ള വിദ്യാർത്ഥികൾക്ക് സുവർണ്ണാവസരമൊരുക്കി കാനഡ. ഫ്രഞ്ച് ഭാഷ സംസാരിക്കുന്ന വിദ്യാർത്ഥികൾക്കുള്ള ഫ്രാങ്കോഫോൺ മൈനോറിറ്റി കമ്മ്യൂണിറ്റി സ്റ്റുഡൻ്റ് പൈലറ്റ് (FMCSP) പ്രോഗ്രാമിന്‍റെ ഈ വർഷത്തെ ഇൻടേക്ക് ഓഗസ്റ്റ് 26 മുതൽ ആരംഭിക്കും. 33 രാജ്യങ്ങളിൽ നിന്നുള്ള വിദേശ വിദ്യാർത്ഥികൾക്ക് 2,970 സ്റ്റഡി പെർമിറ്റുകളാണ് ഈ ഇൻടേക്കിൽ ഉൾപ്പെടുത്തിയിരിക്കുന്നതെന്ന് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ അറിയിച്ചു.

ക്യുബെക്കിന് പുറത്തുള്ള അംഗീകൃത വിദ്യാഭ്യാസ സ്ഥാപനങ്ങളിൽ കുറഞ്ഞത് രണ്ടു വർഷത്തെ ബിരുദ അല്ലെങ്കിൽ ഡിപ്ലോമ കോഴ്‌സുകൾക്ക് പ്രവേശനം നേടുന്ന വിദ്യാർത്ഥികൾക്ക് ഈ പൈലറ്റ് പ്രോഗ്രാം പ്രയോജനപ്പെടുത്താം. എൻ.സി.എൽ.സി ലെവൽ 5 ഫ്രഞ്ച് ഭാഷാ പ്രാവീണ്യമുള്ള അപേക്ഷകരെയാണ് പരിഗണിക്കുക. കൂടാതെ മറ്റു സ്റ്റുഡൻ്റ് വീസകൾക്ക് ആവശ്യമായ പ്രൊവിൻഷ്യൽ അറ്റസ്റ്റേഷൻ ലെറ്റർ (PAL) FMCSP പ്രോഗ്രാമിന് ആവശ്യമില്ല. പഠനം പൂർത്തിയാക്കുന്ന വിദ്യാർത്ഥികൾക്ക് ജോബ് ഓഫറും എക്സ്പീരിയൻസും ഇല്ലാതെ തന്നെ കാനഡയിൽ സ്ഥിരതാമസത്തിന് (Permanent Residency) അപേക്ഷിക്കാൻ സാധിക്കും.