അഭയാർത്ഥി അപേക്ഷാ സംവിധാനത്തിൽ വൻ മാറ്റങ്ങൾ വരുത്തി കനേഡിയൻ സർക്കാർ. രണ്ടു മാസം മുമ്പ് പാസാക്കിയ ബിൽ C-12 പ്രകാരം, അഭയാർത്ഥി അപേക്ഷകൾ സ്വീകരിക്കുന്നതിലും പ്രോസസ്സ് ചെയ്യുന്നതിലും വലിയ പരിഷ്കാരങ്ങളാണ് ഫെഡറൽ സർക്കാർ ലക്ഷ്യമിടുന്നത്. നിലവിലുള്ള മൾട്ടി-ഫോം രീതി ഒഴിവാക്കി, ഏകീകൃതമായ ഒരു ഓൺലൈൻ അപേക്ഷാ സംവിധാനം നടപ്പിലാക്കിയതാണ് പുതിയ മാറ്റങ്ങളിൽ പ്രധാനം.

പുതിയ മാറ്റങ്ങൾ പ്രകാരം, അഭയാർത്ഥി അപേക്ഷകർക്ക് അവരുടെ മുഴുവൻ രേഖകളും അപേക്ഷയും ഓൺലൈനായി സമർപ്പിക്കാൻ 60 ദിവസത്തെ സമയപരിധി ലഭിക്കും. അടിയന്തര സാഹചര്യങ്ങളിൽ ഇത് 30 ദിവസം കൂടി നീട്ടാനുള്ള അവസരവും ഉണ്ടായിരിക്കും. അപേക്ഷകരിൽ നിന്ന് ലഭിക്കുന്ന വിവരങ്ങൾ ആദ്യം സർക്കാർ നേരിട്ട് പരിശോധിച്ച്, സുരക്ഷാ പരിശോധനകൾ പൂർത്തിയാക്കിയ ശേഷം മാത്രമേ അത് ഇമിഗ്രേഷൻ ആൻഡ് റെഫ്യൂജി ബോർഡിലേക്ക് (IRB) റഫർ ചെയ്യുകയുള്ളൂ. അർഹരായ അപേക്ഷകർക്ക് നേരത്തെ വർക്ക് പെർമിറ്റ് ലഭിക്കാനുള്ള അവസരവും ഒരുക്കിയിട്ടുണ്ട്.