പശ്ചിമേഷ്യൻ യുദ്ധവും ഇന്ധനക്ഷാമവും സൃഷ്ടിച്ച പ്രകമ്പനങ്ങൾക്കിടയിലേക്ക് അതിശക്തമായ ‘ഗോഡ്സില്ല’ എൽ-നിനോ കൂടി എത്തുന്നതോടെ ദക്ഷിണ-കിഴക്കേഷ്യൻ രാജ്യങ്ങളുടെ സമ്പദ്‌വ്യവസ്ഥകൾ കടുത്ത പ്രതിസന്ധിയിലേക്ക് നീങ്ങുകയാണ്. ഈ ആഘാതം ഏറ്റവുമധികം ബാധിക്കുന്ന രാജ്യങ്ങളിൽ ഇന്ത്യയും ഉൾപ്പെടുമെന്ന് ഏഷ്യൻ വികസന ബാങ്കും (എഡിബി) ഫിലിപ്പീൻസ് കേന്ദ്രബാങ്കും മുന്നറിയിപ്പ് നൽകുന്നു. സാധാരണ എൽ-നിനോയേക്കാൾ സർവ്വനാശകാരിയായ ‘ഗോഡ്സില്ല’ പ്രതിഭാസം അടുത്ത വർഷം ഫെബ്രുവരി വരെ നീണ്ടുനിൽക്കുമെന്നാണ് വിദഗ്ധരുടെ വിലയിരുത്തൽ.
ഇന്ത്യയിൽ ഈ വർഷത്തെ മൺസൂൺ മഴയിൽ 13 ശതമാനത്തിന്റെ കുറവുണ്ടായിട്ടുണ്ട്. കാർഷിക മേഖലയിലുണ്ടാകുന്ന ഈ ഇടിവ് ഗ്രാമീണ സമ്പദ്‌വ്യവസ്ഥ, എഫ്.എം.സി.ജി, ബാങ്കിങ്, വാഹന വിപണി, സ്റ്റോക്ക് മാർക്കറ്റ് തുടങ്ങിയ വിവിധ മേഖലകളെയും പ്രതികൂലമായി ബാധിക്കും. ഇത് ഭക്ഷ്യവില കുതിച്ചുയരാനും പണപ്പെരുപ്പം വർദ്ധിക്കാനും കാരണമാകും. കൂടാതെ, രാജ്യത്തെ ജിഡിപി വളർച്ച നിരക്ക് 2025-ലെ 7.8 ശതമാനത്തിൽ നിന്ന് 2026-ൽ 7 ശതമാനമായി കുറയുമെന്നും പ്രതീക്ഷിക്കുന്നു. പണപ്പെരുപ്പം പിടിച്ചുകെട്ടുന്നതിന്റെ ഭാഗമായി റിസർവ് ബാങ്ക് റീപ്പോനിരക്ക് വർദ്ധിപ്പിക്കാൻ സാധ്യതയുള്ളത് സാധാരണക്കാരുടെ ഭവന, വാഹന വായ്പകളിൽ വലിയ പലിശഭാരം സൃഷ്ടിക്കും.
