ഏറ്റവും പുതിയ എക്സ്പ്രസ് എൻട്രി നറുക്കെടുപ്പിൽ 356 ഉദ്യോഗാർത്ഥികൾക്ക് ഇൻവിറ്റേഷൻ നൽകിയതായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) അറിയിച്ചു. പ്രൊവിൻഷ്യൽ നോമിനി പ്രോഗ്രാം (PNP) അപേക്ഷകർക്കായി നടത്തിയ ഈ നറുക്കെടുപ്പിൽ 802 എന്ന CRS സ്കോർ ഉള്ളവരെയാണ് പരിഗണിച്ചത്. മാർച്ച് 16-ന് നടന്ന പിഎൻപി നറുക്കെടുപ്പിനെ അപേക്ഷിച്ച് കട്ട് ഓഫ് സ്കോർ 60 പോയിൻ്റ് വർധിച്ചു.
എന്നാൽ, പ്രൊവിൻഷ്യൽ നോമിനേഷൻ ലഭിക്കുന്നവർക്ക് അവരുടെ അടിസ്ഥാന സ്കോറിനൊപ്പം 600 പോയിന്റ് അധികമായി ലഭിക്കും. അതായത്, ഏകദേശം 202 പോയിന്റ് ബേസ് സ്കോർ ഉള്ളവർക്ക് പോലും നോമിനേഷൻ ലഭിച്ചതോടെ ഈ നറുക്കെടുപ്പിൽ ഇടം നേടാൻ സാധിച്ചു. ഒരേ സ്കോർ ലഭിച്ച ഒന്നിലധികം ആളുകൾ ഉള്ളതിനാൽ ‘ടൈ-ബ്രേക്കിംഗ്’ നിയമവും ഇത്തവണ ബാധകമാക്കിയിട്ടുണ്ട്. 2026 ഫെബ്രുവരി 12-ന് മുൻപ് പ്രൊഫൈലുകൾ സമർപ്പിച്ചവർക്കാണ് മുൻഗണന ലഭിച്ചത്. നിലവിൽ കാനഡയുടെ എക്സ്പ്രസ് എൻട്രി പൂളിൽ രണ്ട് ലക്ഷത്തിലധികം അപേക്ഷകർ കാത്തിരിക്കുന്നുണ്ടെങ്കിലും, പിഎൻപി വഴിയുള്ള ഈ നറുക്കെടുപ്പ് അർഹരായവർക്ക് വലിയ ആശ്വാസമാണ് നൽകുന്നത്. അടുത്ത എക്സ്പ്രസ് എൻട്രി നറുക്കെടുപ്പ് മാർച്ച് 31-നോ ഏപ്രിൽ 1-നോ നടക്കുമെന്നാണ് പ്രതീക്ഷിക്കുന്നത്.
