അമേരിക്കയിലെ ഡാലസിൽ നടന്ന വേൾഡ് മലയാളി കൗൺസിലിന്റെ (WMC) പതിനഞ്ചാം ബയനിയൽ ഗ്ലോബൽ കോൺഫറൻസിൽ വെച്ച് പുതിയ ഗ്ലോബൽ ചെയർമാനായി ശ്രീ. ജോൺ മത്തായി തെരഞ്ഞെടുക്കപ്പെട്ടു. മുൻപ് ഡബ്ല്യു.എം.സി ഗ്ലോബൽ പ്രസിഡന്റായും പ്രവർത്തിച്ചിട്ടുള്ള അദ്ദേഹം യു.എ.ഇ ആസ്ഥാനമായ ധന്യ ഗ്രൂപ്പിന്റെ ചെയർമാനും ലോക കേരള സഭാംഗവുമാണ്. കൂടാതെ കിഡ്നി ഫെഡറേഷൻ ഓഫ് ഇന്ത്യ ട്രസ്റ്റി, ‘സ്രോതസ്സ്’ സംഘടനയുടെ സ്ഥാപക പ്രസിഡന്റ് എന്നീ നിലകളിലും ജീവകാരുണ്യ സാമൂഹിക മേഖലകളിൽ സജീവ സാന്നിധ്യമാണ്. അദ്ദേഹത്തിന്റെ ദീർഘകാല പൊതുപ്രവർത്തനത്തിനും സംഘടനാപാടവത്തിനുമുള്ള ആദരവാണ് ഈ പുതിയ പദവി.
30-ാം വാർഷികത്തിലേക്ക് കടക്കുന്ന സംഘടനയെ പൂർണ്ണമായും ഡിജിറ്റൽ ഭരണ സംവിധാനത്തിലേക്ക് മാറ്റുമെന്നും പാർശ്വവൽക്കരിക്കപ്പെട്ടവർക്കായി വിവിധ ഭവന പദ്ധതികൾ നടപ്പിലാക്കുമെന്നും നയപ്രഖ്യാപന പ്രസംഗത്തിൽ അദ്ദേഹം വ്യക്തമാക്കി. ഫിലാഡൽഫിയ പ്രൊവിൻസിന്റെ നേതൃത്വത്തിൽ ആദിവാസി വിഭാഗങ്ങൾക്ക് 25 പ്രകൃതിസൗഹൃദ വീടുകളും, “കാരുണ്യ ഭവനം” പദ്ധതി വഴി കേരളത്തിൽ തിരഞ്ഞെടുക്കപ്പെട്ടവർക്കായി 15 വീടുകളും നിർമ്മിച്ചു നൽകും. നാടിന്റെ വികസനത്തിനായി കേന്ദ്ര-സംസ്ഥാന സർക്കാരുകളുമായി സഹകരിച്ച് പ്രവർത്തിക്കുമെന്നും പുതിയ ഭാരവാഹികൾ അറിയിച്ചു. 2026-2028 കാലയളവിലേക്ക് ജോളി തടത്തിൽ (പ്രസിഡന്റ്), ക്രിസ്റ്റഫർ വർഗീസ് (ജനറൽ സെക്രട്ടറി), ജോൺസൺ തലച്ചെല്ലൂർ (ട്രഷറർ) എന്നിവരടങ്ങുന്ന പുതിയ ഭരണസമിതിയാണ് ചുമതലയേറ്റത്.
