വാഷിംഗടണ് : അമേരിക്കയും കാനഡയും മെക്സികോയും സംയുക്തമായി ആതിഥേയത്വം വഹിക്കുന്ന ഫിഫാ ലോകപ്പ് ഫുട്ബോള് ടൂര്ണമെൻ്റില് പങ്കെടുക്കാൻ ഇറാന് ടീമിന് വീസ അനുവദിച്ചു. ഇറാന് ഫുട്ബോള് ടീമിലെ അംഗങ്ങള്ക്ക് അമേരിക്കയിലേക്ക് പ്രവേശിക്കാനും ലോകകപ്പില് മത്സരിക്കാനും ആവശ്യമായ വീസകള് അനുവദിച്ചതായി അമേരിക്കന് ഉദ്യോഗസ്ഥന് സ്ഥിരീകരിച്ചു. ഈ ആഴ്ച ആദ്യം സ്റ്റേറ്റ് സെക്രട്ടറി മാര്ക്കോ റൂബിയോ ഇറാന് ടീമിന് വീസ നൽകുമെന്ന് വ്യക്തമാക്കിയിരുന്നു.
എന്നാല്, ഇസ്ലാമിക് റവല്യൂഷണറി ഗാര്ഡ് കോര്പ്സുമായി ബന്ധമുള്ളവരെ സംഘത്തില് ഉള്പ്പെടുത്താന് കഴിയില്ലെന്നും യുഎസ് അധികൃതർ മുന്നറിയിപ്പ് നൽകിയിട്ടുണ്ട്. അങ്കാറയിലെ അമേരിക്കന് എംബസിയിലെ ഉദ്യോഗസ്ഥര് ഇറാന് ദേശീയ ഫുട്ബോള് ടീമിനുള്ള വീസ നടപടികള് പൂര്ത്തിയാക്കി. അതേസമയം ഇറാന് ടീം അമേരിക്കയില് മത്സരങ്ങള് കളിക്കുമെങ്കിലും, അമേരിക്കന് ഉപരോധങ്ങളുമായി ബന്ധപ്പെട്ട ചില സങ്കീര്ണതകള് കാരണം അവര് താമസിക്കുന്നത് പ്രധാനമായും മെക്സികോയില് ആയിരിക്കുമെന്നാണ് പ്രതീക്ഷിക്കുന്നത്.
