കാൽഗറിയിലെ വീട്ടുടമസ്ഥർക്ക് ഇരുട്ടടിയായി ആൽബർട്ട സർക്കാരിന്റെ പുതിയ നികുതി പരിഷ്കാരം. പ്രൊവിൻഷ്യൽ പ്രോപ്പർട്ടി ടാക്സ് (വസ്തു നികുതി) വർദ്ധിപ്പിക്കാനുള്ള സർക്കാരിന്റെ തീരുമാനം കാൽഗറി നിവാസികളുടെ കുടുംബ ബജറ്റിനെ സാരമായി ബാധിച്ചേക്കും. വിദ്യാഭ്യാസ മേഖലയ്ക്കുള്ള ഫണ്ട് കണ്ടെത്തുന്നതിന്റെ ഭാഗമായാണ് ഈ വർദ്ധനവ് എന്നാണ് സർക്കാരിന്റെ വിശദീകരണം. നിത്യോപയോഗ സാധനങ്ങളുടെ വിലക്കയറ്റവും വൈദ്യുതി, വെള്ളം തുടങ്ങിയവയുടെ ബില്ലുകളും കാരണം വലയുന്ന സാധാരണക്കാർക്ക് ഈ നികുതി വർദ്ധനവ് താങ്ങാനാവില്ലെന്ന് കാൽഗറി മേയർ ഉൾപ്പെടെയുള്ളവർ ചൂണ്ടിക്കാട്ടുന്നു.
താമസിയാതെ തന്നെ നിങ്ങളുടെ പ്രോപ്പർട്ടി ടാക്സ് ബില്ലുകളിൽ ഈ വർദ്ധനവ് പ്രതിഫലിക്കും. ചിലർക്ക് വർഷം നൂറുകണക്കിന് ഡോളറുകൾ അധികമായി നൽകേണ്ടി വരുമെന്നാണ് പ്രാഥമിക നിഗമനം. സ്കൂളുകളുടെ പ്രവർത്തനത്തിനാവശ്യമായ തുക കണ്ടെത്തുന്നതിനാണ് ഈ ‘എഡ്യൂക്കേഷൻ പ്രോപ്പർട്ടി ടാക്സ്’ വർദ്ധിപ്പിക്കുന്നത്. ഭക്ഷണത്തിനും വാടകയ്ക്കും പോലും പണം കണ്ടെത്താൻ ബുദ്ധിമുട്ടുന്നവർക്ക് മേൽ അധികഭാരം അടിച്ചേൽപ്പിക്കുകയാണെന്ന് വിമർശകർ പറയുന്നു.
ഈ വർദ്ധനവ് പ്രൊവിൻഷ്യൽ സർക്കാരിന്റെ നേരിട്ടുള്ള തീരുമാനമായതിനാൽ കാൽഗറി സിറ്റി കൗൺസിലിന് ഇതിൽ കാര്യമായ ഇടപെടലുകൾ നടത്താൻ കഴിയില്ല. പണം കണ്ടെത്താൻ മറ്റു വഴികൾ നോക്കാതെ സാധാരണക്കാരനെ ബാധിക്കുന്ന സർക്കാരിന്റെ ഈ നീക്കത്തിനെതിരെ വലിയ പ്രതിഷേധമാണ് ഉയരുന്നത്.
