ആൽബർട്ടയിൽ നിന്ന് ബ്രിട്ടീഷ് കൊളംബിയ തീരം വരെ പുതിയ പൈപ്പ് ലൈൻ നിർമിക്കുന്നതിനുള്ള പദ്ധതി കാനഡ പ്രധാനമന്ത്രി മാർക്ക് കാർണിയും ആൽബർട്ട പ്രീമിയർ ഡാനിയേൽ സ്മിത്തും ചേർന്ന് പ്രഖ്യാപിച്ചു. പൊതു-സ്വകാര്യ പങ്കാളിത്തത്തോടെയാണ് ഈ വൻകിട പദ്ധതി നടപ്പാക്കുന്നത്. സർക്കാർ ഉടമസ്ഥതയിലുള്ള ‘ട്രാൻസ് മൗണ്ടൻ കോർപ്പറേഷനും’ സ്വകാര്യ മേഖലയിലെ പ്രമുഖ കമ്പനിയായ ‘പെമ്പിന പൈപ്പ്‌ലൈൻ കോർപ്പറേഷനും’ സംയുക്തമായാണ് പദ്ധതിയുടെ ആസൂത്രണവും നിർമ്മാണവും നടപ്പിലാക്കുന്നത്. പുതിയ ലൈനും സ്ഥാപിക്കുക. ആൽബർട്ടയിലെ ബ്രൂഡർഹൈമിൽ നിന്ന് തുടങ്ങി ബി.സി.യുടെ തെക്കൻ തീരത്തെ വലിയ എണ്ണക്കപ്പലുകൾക്ക് അടുക്കാൻ ശേഷിയുള്ള ആഴക്കടൽ തുറമുഖം വരെയായിരിക്കും ഈ പാത.
പ്രതിദിനം 10 ലക്ഷം ബാരൽ എണ്ണ കടത്തിവിടാൻ ശേഷിയുള്ള പുതിയ പൈപ്പ്‌ലൈൻ പദ്ധതിയിൽ പ്രാദേശിക ആദിവാസി സമൂഹങ്ങളെ പങ്കാളികളാക്കുന്നതിനുള്ള ചർച്ചകൾ ഫെഡറൽ-പ്രവിശ്യാ സർക്കാരുകൾ ഉടൻ ആരംഭിക്കും.
എണ്ണമണൽ ഖനനത്തിൽ നിന്നുള്ള കാർബൺ പുറന്തള്ളൽ കുറയ്ക്കുക എന്ന ലക്ഷ്യത്തോടെയുള്ള ‘പാത്ത്‌വേസ് പ്രൊജക്റ്റുമായി’ ചേർന്നായിരിക്കും പുതിയ പദ്ധതി പ്രവർത്തിക്കുക. വടക്കൻ തീരത്തെ ടാങ്കർ നിരോധനം നിലനിർത്തിയതിൽ പ്രദേശവാസികളും പരിസ്ഥിതി സംഘടനകളും ആശ്വാസം പ്രകടിപ്പിച്ചു. എന്നാൽ തെക്കൻ തീരത്തുണ്ടാകാനിടയുള്ള എണ്ണച്ചോർച്ചാ സാധ്യതകളെക്കുറിച്ച് പരിസ്ഥിതി പ്രവർത്തകർ ആശങ്ക ഉന്നയിക്കുന്നുണ്ട്.
