ഒട്ടാവ: വിദേശ രാജ്യങ്ങളിൽ നിന്ന് ഉന്നത വിദ്യാഭ്യാസം നേടിയ ഉദ്യോഗാർത്ഥികൾക്ക് കാനഡയിൽ തങ്ങളുടെ തൊഴിൽ മേഖലകളിൽ വേഗത്തിൽ ജോലി ലഭിക്കുന്നതിനായി പുതിയ ലക്ഷ്യങ്ങൾ പ്രഖ്യാപിച്ച് ഫെഡറൽ ഗവൺമെന്റ്. എംപ്ലോയ്മെന്റ് ആൻഡ് സോഷ്യൽ ഡെവലപ്മെന്റ് കാനഡ പുറത്തിറക്കിയ 2026-27 വർഷത്തെ ഡിപ്പാർട്ട്മെന്റൽ പ്ലാൻ പ്രകാരം, വിദേശ ബിരുദങ്ങൾക്കും പ്രവൃത്തിപരിചയത്തിനും അംഗീകാരം നൽകുന്നതിനായി 58 പുതിയ കരാറുകളിൽ ഒപ്പിടാൻ തീരുമാനിച്ചു. ഇതിലൂടെ ഏകദേശം 32,000 അന്താരാഷ്ട്ര പ്രൊഫഷണലുകൾക്ക് പ്രയോജനം ലഭിക്കുമെന്നാണ് കണക്കാക്കപ്പെടുന്നത്.
പ്രധാനമായും ആരോഗ്യ സംരക്ഷണം, നിർമ്മാണം എന്നീ മേഖലകളിലാണ് ഈ പദ്ധതി കൂടുതൽ ശ്രദ്ധ കേന്ദ്രീകരിക്കുന്നത്. കാനഡയിൽ നിലവിലുള്ള കടുത്ത തൊഴിലാളി ക്ഷാമം പരിഹരിക്കുന്നതിനായി വിദേശ നഴ്സുമാർ, ഡോക്ടർമാർ, സിവിൽ എഞ്ചിനീയർമാർ, മറ്റ് സാങ്കേതിക വിദഗ്ധർ എന്നിവർക്ക് കാനഡയിലെ ലൈസൻസിംഗ് നടപടികൾ ലഘൂകരിക്കാൻ ഈ കരാറുകൾ സഹായിക്കും. പ്രവിശ്യകൾ, റെഗുലേറ്ററി ബോഡികൾ, വിവിധ തൊഴിൽ സംഘടനകൾ എന്നിവയുമായി ചേർന്നാണ് കേന്ദ്ര സർക്കാർ ഈ പദ്ധതി നടപ്പിലാക്കുന്നത്.
ഈ പദ്ധതിയുടെ ഭാഗമായി ‘ഫോറിൻ ക്രെഡൻഷ്യൽ റെക്കഗ്നിഷൻ ആക്ഷൻ ഫണ്ട്’ എന്ന പേരിൽ 97 ദശലക്ഷം ഡോളറിന്റെ പ്രത്യേക നിധിയും സർക്കാർ രൂപീകരിച്ചിട്ടുണ്ട്. അഞ്ച് വർഷത്തേക്ക് നീണ്ടുനിൽക്കുന്ന ഈ ഫണ്ട് ഉപയോഗിച്ച് വിദേശ ബിരുദങ്ങൾ വിലയിരുത്തുന്ന രീതി കൂടുതൽ സുതാര്യവും വേഗത്തിലുള്ളതുമാക്കും. വിദേശത്തുനിന്ന് വരുന്നവർക്ക് തങ്ങളുടെ യോഗ്യത തെളിയിക്കുന്നതിനുള്ള പരീക്ഷാ ഫീസുകൾ, അധിക പരിശീലനം, ട്യൂഷൻ ഫീസ് എന്നിവയ്ക്കായി 15,000 മുതൽ 30,000 ഡോളർ വരെ കുറഞ്ഞ പലിശയിൽ ലോണുകൾ നൽകുന്ന പദ്ധതിയും ഇതിന്റെ ഭാഗമാണ്.
കാനഡയിലേക്ക് കുടിയേറുന്നവർക്ക് അവരുടെ യോഗ്യതയ്ക്ക് അനുസരിച്ചുള്ള ജോലി ലഭിക്കാത്ത സാഹചര്യം ഒഴിവാക്കുക എന്നതാണ് സർക്കാരിന്റെ ലക്ഷ്യം. ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ ഇതിനായി ഉദ്യോഗാർത്ഥികൾ കാനഡയിൽ എത്തുന്നതിന് മുൻപ് തന്നെ കരിയർ കൗൺസിലിംഗും മെന്റർഷിപ്പും നൽകും. വിദേശത്ത് നിന്നുള്ള വിദഗ്ധ തൊഴിലാളികൾക്ക് കാനഡയിലെ തൊഴിൽ വിപണിയിലേക്ക് സുഗമമായി പ്രവേശിക്കാനുള്ള ഏറ്റവും വലിയ ചുവടുവെപ്പായി ഈ പുതിയ ലക്ഷ്യങ്ങൾ മാറുമെന്ന് സാമ്പത്തിക വിദഗ്ധർ വിലയിരുത്തുന്നു.
