കാനഡയിൽ ആദ്യമായി സ്റ്റാൻഡിംഗ് കോൺഫറൻസ് ഓഫ് ഓറിയന്റൽ ഓർത്തഡോക്സ് ചർച്ചസ് (SCOOCH) യോഗം സംഘടിപ്പിച്ച് എഡ്മിന്റൻ സുറിയാനി ഓർത്തഡോക്സ് സഭ. ജൂൺ 10-ന് നടന്ന സ്കൂച്ച് ആൽബർട്ട യൂണിറ്റിന്റെ പ്രാഥമിക സമ്മേളനത്തിൽ വിവിധ ഓറിയന്റൽ ഓർത്തഡോക്സ് സഭകളിലെ വൈദികരും അൽമായ നേതാക്കളും പങ്കെടുത്തു. മോർ തീത്തോസ് യൽദോ മെത്രാപ്പോലീത്ത സമ്മേളനത്തിൽ അധ്യക്ഷത വഹിച്ചു. വടക്കേ അമേരിക്കയിലെ SCOOCH കോർ ഡെലിഗേറ്റ് ടീമംഗം കൂടിയായ മോർ തീത്തോസ് യൽദോ വിവിധ സഭകൾ നേരിടുന്ന പൊതുവായ വെല്ലുവിളികൾ, പരസ്പര സഹകരണം, ഐക്യം, സൗഹൃദം എന്നിവ സംബന്ധിച്ച ചർച്ചകൾക്ക് നേതൃത്വം നൽകി. കോപ്റ്റിക് ഓർത്തഡോക്സ്, എറിത്രിയൻ ഓർത്തഡോക്സ്, എത്യോപ്യൻ ഓർത്തഡോക്സ്, സുറിയാനി ഓർത്തഡോക്സ് സഭകളുടെ പ്രതിനിധികൾ സമ്മേളനത്തിൽ പങ്കെടുത്തു. കോപ്റ്റിക് ഓർത്തഡോക്സ് സഭയെ പ്രതിനിധീകരിച്ച് ഫാ. റെവിസ് റോഫായേലും ഡീക്കൻ ബേസിൽ ഇലിയാസും പങ്കെടുത്തു. എറിത്രിയൻ ഓർത്തഡോക്സ് സഭയിൽ നിന്ന് ഫാ. സെമരെ സിഭാതു, ഫാ. ഡെബ്രെറ്റ്സിയോൻ അരായ, ഫാ. പൗലോസ് ടെകസ്റ്റേ എന്നിവരും മറ്റ് പ്രതിനിധികളും പങ്കാളികളായി. എത്യോപ്യൻ ഓർത്തഡോക്സ് സഭയെ പ്രതിനിധീകരിച്ച് ഫാ. മെസ്മിർ കാസ്സ, ഫാ. ഫാസിൽ മുലുഗേറ്റ, ഷൈംസ് മെറേസ എന്നിവരും പങ്കെടുത്തു.
യോഗത്തിൽ ഭാവി പ്രവർത്തനങ്ങൾ ഏകോപിപ്പിക്കുന്നതിനായി താൽക്കാലിക കമ്മിറ്റി രൂപീകരിച്ചു. റവ. ഫാ. റെവിസ് റോഫായേൽ ചെയർമാനായും, ഫാ. തോമസ് കെ. പൂത്തിക്കോട്ട് സെക്രട്ടറിയായും, ഫാ. പൗലോസ് ടെകസ്റ്റേ കോ-ഓർഡിനേറ്ററായും തിരഞ്ഞെടുക്കപ്പെട്ടു. ആതിഥേയരായ സുറിയാനി ഓർത്തഡോക്സ് സഭയുടെ പ്രതിനിധി സംഘത്തിന് ഇടവക വികാരിയും പ്രസിഡൻ്റുമായ ഫാ. തോമസ് കെ. പൂത്തിക്കോട്ട് നേതൃത്വം നൽകി. ഫാ. വർഗീസ് തെക്കേക്കര, ക്നാനായ അതിഭദ്രാസനത്തെ പ്രതിനിധീകരിച്ച് ഫാ. ജേക്കബ് ടി.ഐ., ഡീക്കൻ ഡോ. സിനോജ് എബ്രഹാം, ഡീക്കൻ ഡോ. ജോബിൻ ചാക്കോ, അബി നെല്ലിക്കൽ, ബേസിൽ മാത്യു എന്നിവരും സംഘത്തിലുണ്ടായിരുന്നു. അർമേനിയൻ ഓർത്തഡോക്സ് സഭയുടെ നേതൃത്വവും ഭാവിയിലെ പ്രവർത്തനങ്ങളിൽ സഹകരിക്കാനുള്ള താൽപര്യം അറിയിച്ചതായി സംഘാടകർ അറിയിച്ചു.
