അമേരിക്കൻ നേവി മെഡിക്കൽ കോർപ്സിൽ ലെഫ്റ്റനന്റ് കമാൻഡറായ മലയാളി യുവാവ് ഷെയ്ൻ പി. ജോസഫിന് യു.എസ് പ്രസിഡന്റിന്റെ വിശിഷ്ട പുരസ്കാരം ലഭിച്ചു. യു.എസ് നേവിയിൽ അദ്ദേഹം നൽകിയ മികച്ച സേവനങ്ങളെ മാനിച്ചാണ് ഈ അംഗീകാരം. മേരിലാൻഡിലെ അനാ പൊലീസിലുള്ള യുണൈറ്റഡ് സ്റ്റേറ്റ്സ് നേവൽ അക്കാദമിയിൽ സംഘടിപ്പിച്ച ചടങ്ങിൽ വെച്ച്, നേവി റിയർ അഡ്മിറൽ കമാൻഡർ ആർ.ജെ. ഹോക്കിൻസിൽ നിന്ന് ഷെയ്ൻ പ്രസിഡൻഷ്യൽ അവാർഡും സർട്ടിഫിക്കറ്റും ഏറ്റുവാങ്ങി. രാജ്യത്തിന് മികച്ച രീതിയിൽ സേവനമനുഷ്ഠിക്കുന്ന സൈനിക ആരോഗ്യ പ്രവർത്തകർക്കും ഓഫീസർമാർക്കും നൽകുന്ന ഏറ്റവും ഉയർന്ന ബഹുമതികളിലൊന്നാണിത്. സാജൻ ജോസഫ് – മെഴ്സി ജോസഫ് ദമ്പതികളുടെ മകനാണ് ഷെയ്ൻ. സാൻ ഫ്രാൻസിസ്കോ സെന്റ് ഗ്രിഗോറിയോസ് ഓർത്തഡോക്സ് ഇടവകയിലെ സജീവ അംഗങ്ങളാണ് ഈ കുടുംബം. ഷെയ്ന്റെ ഈ ചരിത്രനേട്ടത്തിൽ ബന്ധുക്കളും ഇടവക സമൂഹവും ആഹ്ലാദം പ്രകടിപ്പിച്ചു. ബഹുമതി ഏറ്റുവാങ്ങിയ ശേഷം പള്ളിയിൽ വച്ച് അദ്ദേഹത്തിന് ഊഷ്മളമായ സ്വീകരണവും അനുമോദനവും നൽകി.
