മിയാമി: പ്രമുഖ അമേരിക്കൻ ദിനപത്രമായ വാൾസ്ട്രീറ്റ് ജേർണലിനെതിരെ യുഎസ് പ്രസിഡന്റ് ഡൊണാൾഡ് ട്രംപ് നൽകിയ മാനനഷ്ടക്കേസ് ഫെഡറൽ കോടതി തള്ളി. അന്തരിച്ച ലൈംഗിക കുറ്റവാളി ജെഫ്രി എപ്സ്റ്റീനുമായി ബന്ധപ്പെട്ട വാർത്ത തന്റെ സൽപ്പേരിന് കളങ്കമുണ്ടാക്കിയെന്ന് ആരോപിച്ചാണ് ട്രംപ് കോടതിയെ സമീപിച്ചത്. എന്നാൽ, പത്രം നൽകിയ വാർത്തയിൽ ദുരുദ്ദേശ്യം തെളിയിക്കാൻ ട്രംപിന് സാധിച്ചില്ലെന്ന് നിരീക്ഷിച്ച ജഡ്ജി ഡാരിൻ പി. ഗെയ്ൽസ് കേസ് തള്ളുകയായിരുന്നു.
2003-ൽ ജെഫ്രി എപ്സ്റ്റീന്റെ ജന്മദിനത്തിന് ട്രംപ് അയച്ചുവെന്ന് പറയപ്പെടുന്ന ഒരു ആശംസ കാർഡിനെക്കുറിച്ചുള്ള വാർത്തയാണ് കേസിന് ആധാരമായത്. ട്രംപിന്റെ ഒപ്പോടുകൂടിയ ഈ കാർഡ് വ്യാജമാണെന്ന് അദ്ദേഹത്തിന്റെ അഭിഭാഷകർ വാദിച്ചു. എന്നാൽ, വാർത്ത പ്രസിദ്ധീകരിക്കുന്നതിന് മുൻപ് പത്രം ട്രംപിന്റെ വിശദീകരണം തേടുകയും അത് വാർത്തയിൽ ഉൾപ്പെടുത്തുകയും ചെയ്തിട്ടുണ്ടെന്ന് കോടതി ചൂണ്ടിക്കാട്ടി. ഒരു പൊതുപ്രവർത്തകൻ എന്ന നിലയിൽ, ഒരു വാർത്ത തെറ്റാണെന്ന് സ്ഥാപിക്കുന്നതിനപ്പുറം അത് തന്നെ മനഃപൂർവ്വം അപകീർത്തിപ്പെടുത്താൻ ഉദ്ദേശിച്ചുള്ളതാണെന്ന് തെളിയിക്കാൻ ട്രംപിന് കഴിഞ്ഞില്ലെന്ന് കോടതി വ്യക്തമാക്കി.
തനിക്കെതിരെ തെറ്റായ വാർത്തകൾ നൽകുന്ന മാധ്യമങ്ങളെ നിയമപരമായി നേരിടുമെന്ന ട്രംപിന്റെ പ്രഖ്യാപനത്തിന് ലഭിച്ച വലിയൊരു തിരിച്ചടിയായാണ് ഈ വിധി വിലയിരുത്തപ്പെടുന്നത്. ന്യൂയോർക്ക് ടൈംസ്, ബിബിസി തുടങ്ങിയ മാധ്യമങ്ങൾക്കെതിരെയും ട്രംപ് സമാനമായ കേസുകൾ നൽകിയിട്ടുണ്ട്. എപ്സ്റ്റീൻ കേസിലെ അന്വേഷണ വിവരങ്ങൾ പുറത്തുവിടുന്നതിൽ സർക്കാർ വീഴ്ച വരുത്തിയെന്ന വിമർശനങ്ങൾക്കിടയിലാണ് ട്രംപ് ഈ കേസ് ഫയൽ ചെയ്തത്. ഏപ്രിൽ 27-നകം പരാതിയിൽ ഭേദഗതി വരുത്തി വീണ്ടും സമർപ്പിക്കാൻ കോടതി ട്രംപിന് അനുവാദം നൽകിയിട്ടുണ്ട്. വിധി തങ്ങളുടെ എഡിറ്റോറിയൽ നിലപാടുകൾക്കുള്ള അംഗീകാരമാണെന്ന് വാൾസ്ട്രീറ്റ് ജേർണൽ പ്രതികരിച്ചു.
