ഓട്ടവ: കാനഡ താൽക്കാലിക വിദേശ തൊഴിലാളി പരിപാടി അവസാനിപ്പിക്കണമെന്ന് കൺസർവേറ്റീവ് നേതാവ് പിയറി പൊയിലീവ്രെ. നമ്മുടെ യുവാക്കളെയും തൊഴിലാളികളെയും സംരക്ഷിക്കുന്നതിന് നിർണായക നടപടി സ്വീകരിക്കേണ്ട സമയമാണിത് എന്ന് പൊയ്ലിവ്രെ പറഞ്ഞു. പുതിയ TFW പെർമിറ്റുകൾ നൽകുന്നത് ഉടൻ നിർത്തണം. വേതനം കുറയ്ക്കുകയും അവസരങ്ങൾ കവർന്നെടുക്കുകയും ചെയ്യുന്ന ഈ പരിപാടി അവസാനിപ്പിക്കണമെന്ന് പൊയിലീവ്രെ സർക്കാരിനോട് വാർത്താക്കുറിപ്പിലൂടെ ആവശ്യപ്പെട്ടു.
താൽക്കാലിക വിദേശ തൊഴിലാളി പരിപാടി ശാശ്വതമായി നിർത്തലാക്കണമെന്ന് പൊയ്ലിവ്രെ പറഞ്ഞു. പകരം, കാർഷിക ജോലികൾക്കായി മാത്രമായി ഒരു പുതിയ പരിപാടി തുടങ്ങണമെന്നും അദ്ദേഹം ആവശ്യപ്പെട്ടു. താത്കാലിക വിദേശ തൊഴിലാളി പദ്ധതിക്കെതിരെ വിമർശനങ്ങൾ ഉയരുന്നതിനിടയിലാണ് അദ്ദേഹം ഈ നിർദ്ദേശം മുന്നോട്ടുവച്ചത്. കൂലി കുറഞ്ഞ തൊഴിലാളികളെ ഉപയോഗിക്കുന്നത് പ്രാദേശിക സമൂഹങ്ങളിൽ വേതനം ഉയരുന്നത് തടയാൻ ഇടയാക്കുന്നുവെന്നാണ് പലരും ആരോപിക്കുന്നത്. ഈ വർഷം താൽക്കാലിക വിദേശ തൊഴിലാളി പദ്ധതിയിലൂടെ 82,000 പുതിയ കുടിയേറ്റക്കാരെ പ്രവേശിപ്പിക്കാനാണ് കാനഡ ലക്ഷ്യമിടുന്നതെന്നാണ് ഫെഡറൽ ഡാറ്റകൾ സൂചിപ്പിക്കുന്നത്. പ്രോഗ്രാമിൽ നിയന്ത്രണങ്ങൾ ഏർപ്പെടുത്തുന്നതായി കഴിഞ്ഞ വർഷം, ഫെഡറൽ സർക്കാർ പ്രഖ്യാപിച്ചിരുന്നു.
