വിവാഹ വാഗ്ദാനം നൽകി യുവതിയെ ലൈംഗികമായി ചൂഷണം ചെയ്ത പത്തനംതിട്ട ഡിസിആർബി സിഐ ടി.കെ.വിനോദ് കൃഷ്ണയെ സർവീസിൽ നിന്ന് സസ്‌പെൻഡ് ചെയ്തു. സർവീസിൽ നിന്ന് വിരമിക്കാൻ ഇനി രണ്ട് വർഷം മാത്രം ബാക്കിയുള്ളപ്പോഴാണ് ഉദ്യോഗസ്ഥനെതിരെ പോലീസ് നടപടിയെടുത്തിരിക്കുന്നത്.
എലവുംതിട്ടയിൽ സിഐ ആയി സേവനമനുഷ്ഠിക്കവെയാണ് വിനോദ് കൃഷ്ണ പരാതിക്കാരിയായ യുവതിയുമായി സൗഹൃദത്തിലാകുന്നത്. തുടർന്ന്, സ്വന്തം ഭാര്യയുമായുള്ള വിവാഹബന്ധം നിയമപരമായി വേർപ്പെടുത്തിയ ശേഷം യുവതിയെ വിവാഹം കഴിക്കാമെന്ന് ഉറപ്പുനൽകുകയായിരുന്നു. ഈ വാഗ്ദാനത്തിന്റെ അടിസ്ഥാനത്തിൽ തിരുവനന്തപുരം പേരൂർക്കടയിൽ സിഐ ആയിരുന്ന സമയത്ത് അദ്ദേഹം യുവതിയെ അവിടെ ഒപ്പം താമസിപ്പിച്ചു.
എന്നാൽ, പിന്നീട് പറഞ്ഞ വാഗ്ദാനത്തിൽ നിന്ന് സിഐ പിന്മാറാൻ തുടങ്ങിയതോടെയാണ് യുവതി ജില്ലാ പോലീസ് മേധാവിക്ക് പരാതി നൽകാൻ തയ്യാറായത്. യുവതിയുടെ പരാതി അന്വേഷിച്ച് കുറ്റക്കാരനാണെന്ന് കണ്ടെത്തിയതോടെയാണ് ഉദ്യോഗസ്ഥനെതിരെ സസ്‌പെൻഷൻ നടപടിയുണ്ടായത്.
