ഓട്ടവ : ഉയർന്ന ജീവിതച്ചെലവുകൾ കാരണം കനേഡിയൻ ജനത സാമ്പത്തികമായി ബുദ്ധിമുട്ടുന്നതായി പുതിയ സർവേ റിപ്പോർട്ട്. വർധിച്ചുവരുന്ന ചെലവുകൾ കാരണം ജീവിതനിലവാരം നിലനിർത്താൻ ബുദ്ധിമുട്ടുകയാണെന്ന് RBC സർവേ സൂചിപ്പിക്കുന്നു. സർവേയിൽ പങ്കെടുത്ത 48 ശതമാനം പേരും ഇപ്പോഴത്തെ ജീവിതനിലവാരം നിലനിർത്തുക ബുദ്ധിമുട്ടാണെന്ന് പ്രതികരിച്ചു.
അതേസമയം 48 ശതമാനം പേർ ഇനിയൊരു നല്ല സാമ്പത്തിക ഭാവി ഉണ്ടാകില്ലെന്ന് വിശ്വസിക്കുന്നവരാണ്. പണപ്പെരുപ്പം രണ്ട് ശതമാനത്തിലേക്ക് തിരിച്ചെത്തിയിട്ടും, സാമ്പത്തിക ബുദ്ധിമുട്ട് തുടരുകയാണെന്നും ആർബിസി റിപ്പോർട്ട് കണ്ടെത്തി. തങ്ങളുടെ വരുമാനം മുഴുവൻ അവശ്യ ബില്ലുകൾക്കും മറ്റു ചെലവുകൾക്കുമായി വീതിച്ച് നൽകേണ്ട അവസ്ഥയിലാണെന്ന് സർവേയിൽ പങ്കെടുത്ത 50 ശതമാനം പേരും പറയുന്നു . 47 ശതമാനം പേർ വർദ്ധിച്ചുവരുന്ന ചെലവുകൾ നേരിടുന്നതിനായി തങ്ങളുടെ എമർജൻസി ഫണ്ടിൽ നിന്നും വിരമിക്കൽ സമ്പാദ്യത്തിൽ നിന്നുമെല്ലാം ഫണ്ട് പിൻവലിക്കേണ്ടതായി വന്നെന്നും പറയുന്നു. സർവേയിൽ പങ്കെടുത്തവരിൽ 60 ശതമാനം പേരും അപ്രതീക്ഷിത ചെലവുകൾ നിർവ്വഹിക്കാൻ ആവശ്യമായ പണമില്ലെന്ന ആശങ്കയിലാണ്.
