ക്യുബെക്ക് നാഷണൽ അസംബ്ലിയിലേക്ക് ആരൊക്കെ തിരഞ്ഞെടുക്കപ്പെടും എന്ന് നിർണ്ണയിക്കുന്നതിൽ നിർണ്ണായകമാകുന്ന ‘ഏർലി വോട്ടിങ്’ (മുൻകൂർ വോട്ടിങ്) ആരംഭിച്ചു. സെപ്റ്റംബർ 27, 28 തീയതികളിൽ (ഞായർ, തിങ്കൾ) നടക്കുന്ന വോട്ടെടുപ്പിനായി സാധാരണയേക്കാൾ ഏകദേശം നാല് മടങ്ങ് അധികം പോളിങ് ബൂത്തുകളാണ് ‘ഇലക്ഷൻസ് ക്യുബെക്ക്’ (Élections Québec) സജ്ജീകരിച്ചിരിക്കുന്നത്. ഈ പോളിങ് ബൂത്തുകളിൽ രാവിലെ 9:30 മുതൽ രാത്രി 8 വരെ യോഗ്യരായ വോട്ടർമാർക്ക് അവരുടെ സമ്മതിദാനാവകാശം രേഖപ്പെടുത്താം. വോട്ട് ചെയ്യേണ്ട പോളിങ് ബൂത്തുകളുടെ വിലാസവും മറ്റ് വിവരങ്ങളും വോട്ടർമാർക്ക് തപാൽ വഴി ലഭിച്ച രജിസ്ട്രേഷൻ അറിയിപ്പിലും ‘ഇലക്ഷൻസ് ക്യുബെക്ക്’ വെബ്സൈറ്റിലും ലഭ്യമാണ്. പ്രവിശ്യാ തിരഞ്ഞെടുപ്പ് ഒക്ടോബർ 5 തിങ്കളാഴ്ച നടക്കും.
കൂടാതെ കമ്പ്യൂട്ടർവൽക്കരിച്ച വോട്ടർ രജിസ്ട്രി സംവിധാനം നിലവിലുള്ളതിനാൽ, ക്യുബെക്കിൽ എവിടെയായിരുന്നാലും സെപ്റ്റംബർ 29 ചൊവ്വ മുതൽ ഒക്ടോബർ 1 വ്യാഴം വരെ റിട്ടേണിങ് ഓഫീസറുടെ ഓഫീസിൽ നേരിട്ടെത്തി വോട്ട് ചെയ്യാൻ സാധിക്കും. തങ്ങളുടെ റൈഡിങ്ങുകളുടെ പുറത്ത് താൽക്കാലികമായി താമസിക്കുന്ന വിദ്യാർത്ഥികൾക്ക് വിവിധ CEGEP-കൾ, സർവ്വകലാശാലകൾ, വൊക്കേഷണൽ ട്രെയിനിങ് സെന്ററുകൾ എന്നിവിടങ്ങളിൽ വോട്ട് ചെയ്യാം.
ക്യുബെക്ക് നാഷണൽ അസംബ്ലി പിരിച്ചുവിടുന്നതിന് മുൻപ്, 79 അംഗങ്ങളുമായി ‘കൊയലിഷൻ അവെനിർ ക്യുബെക്ക്’ (CAQ) ആയിരുന്നു പ്രവിശ്യ ഭരിച്ചിരുന്നത്. നാഷണൽ അസംബ്ലിയിൽ ‘ക്യുബെക്ക് ലിബറൽ പാർട്ടി’ക്ക് (PLQ) 18 അംഗങ്ങളും, ‘ക്യുബെക്ക് സോളിഡയറിന്’ (QS) 11 സീറ്റുകളും, ‘പാർട്ടി ക്യുബെക്കോയിസിന്’ (PQ) ഏഴ് അംഗങ്ങളും ഉണ്ടായിരുന്നു. കൂടാതെ, ഒമ്പത് സ്വതന്ത്ര അംഗങ്ങളും ‘ക്യുബെക്ക് കൺസർവേറ്റീവ് പാർട്ടി’യിൽ നിന്ന് ഒരാളും നിയമസഭാംഗമായി ഉണ്ടായിരുന്നു.
