ടൊറന്റോ: വരാനിരിക്കുന്ന ഫിഫ ലോകകപ്പിന്റെ സുരക്ഷാ ക്രമീകരണങ്ങൾക്കായി 145 ദശലക്ഷം ഡോളർ (ഏകദേശം 1,200 കോടി രൂപ) കൂടി അനുവദിക്കുമെന്ന് കാനഡ സർക്കാർ പ്രഖ്യാപിച്ചു. കാനഡയുടെ പബ്ലിക് സേഫ്റ്റി മന്ത്രി ഗാരി ആനന്ദസംഗരിയാണ് ടൊറന്റോയിൽ നടന്ന വാർത്താ സമ്മേളനത്തിൽ ഇക്കാര്യം അറിയിച്ചത്.
അമേരിക്ക, മെക്സിക്കോ എന്നിവർക്കൊപ്പം കാനഡയും ആതിഥേയത്വം വഹിക്കുന്ന ടൂർണമെന്റ് ജൂൺ 11 മുതൽ ജൂലൈ 19 വരെയാണ് നടക്കുന്നത്. കാനഡയിലെ ടൊറന്റോ, വാൻകൂവർ എന്നീ നഗരങ്ങളിലായി 13 മത്സരങ്ങളാണ് നടക്കുക.
“ലോകകപ്പ് മത്സരങ്ങൾ ആസ്വദിക്കാനെത്തുന്നവരുടെ സുരക്ഷ ഉറപ്പാക്കുന്നതിൽ പ്രവിശ്യകളെയും മുനിസിപ്പാലിറ്റികളെയും ഈ ഫണ്ട് സഹായിക്കും. സുരക്ഷിതവും സുസംഘടിതവുമായ രീതിയിൽ ടൂർണമെന്റ് നടത്തുന്നതിന് ആവശ്യമായ വിഭവങ്ങൾ നിയമപാലകർക്ക് ലഭ്യമാണെന്ന് ഇതിലൂടെ ഉറപ്പാക്കാം,” മന്ത്രി ഗാരി ആനന്ദസംഗരി പറഞ്ഞു.
അനുവദിച്ച തുകയിൽ 45 ദശലക്ഷം ഡോളർ ടൊറന്റോയ്ക്കും, 100 ദശലക്ഷം ഡോളർ വാൻകൂവറിനുമായാണ് നീക്കിവെച്ചിരിക്കുന്നത്. ആതിഥേയ നഗരങ്ങൾക്കായി ഫെഡറൽ ഗവൺമെന്റ് നേരത്തെ അനുവദിച്ച 220 ദശലക്ഷം ഡോളറിന് പുറമെയാണിത്. ടൂർണമെന്റ് നടത്തുന്നതിനായി ഓട്ടവ ഇതിനകം തന്നെ 320 ദശലക്ഷം ഡോളർ വരെ അനുവദിച്ചിട്ടുണ്ട്.
