ടൊറന്റോ: കാനഡയും ഐക്യ അറബ് എമിറേറ്റും (യു.എ.ഇ) തമ്മിലുള്ള സമഗ്ര സാമ്പത്തിക പങ്കാളിത്ത കരാർ (CEPA) ചർച്ചകൾ വിജയകരമായി പൂർത്തിയായി. ടൊറന്റോയിൽ നടന്ന ചടങ്ങിൽ കാനഡയുടെ അന്താരാഷ്ട്ര വ്യാപാര മന്ത്രി മണീന്ദർ സിദ്ധുവും യു.എ.ഇ വിദേശ വ്യാപാര സഹമന്ത്രി ഡോ. താനി ബിൻ അഹമ്മദ് അൽ സിയൂദിയും ചേർന്നാണ് ചർച്ചകളുടെ വിജയകരമായ സമാപനം പ്രഖ്യാപിച്ചത്. ഇരുരാജ്യങ്ങളും തമ്മിലുള്ള സാമ്പത്തിക ബന്ധത്തിൽ ഇതൊരു സുപ്രധാന നാഴികക്കല്ലാണ്.
2025 നവംബറിൽ പ്രധാനമന്ത്രി മാർക്ക് കാർണിയുടെ യു.എ.ഇ സന്ദർശനവേളയിലാണ് ഈ കരാറിനായുള്ള ചർച്ചകൾക്ക് തുടക്കമിട്ടത്. ചരിത്രത്തിലെ ഏറ്റവും വേഗത്തിൽ പൂർത്തിയാക്കിയ കരാർ ചർച്ചകളിലൊന്നാണിത്. കരാർ നിലവിൽ വരുന്നതോടെ ഇരുരാജ്യങ്ങളും തമ്മിലുള്ള വ്യാപാര-നിക്ഷേപ ബന്ധങ്ങൾ കൂടുതൽ ശക്തമാവുകയും, ബിസിനസുകൾക്കുള്ള വിപണി പ്രവേശനം എളുപ്പമാവുകയും ചെയ്യും. കൂടാതെ വ്യാപാര തടസ്സങ്ങൾ കുറയ്ക്കാനും, സപ്ലൈ ചെയിൻ സംവിധാനങ്ങൾ മെച്ചപ്പെടുത്താനും, തൊഴിലാളികൾക്കും സംരംഭകർക്കും പുതിയ തൊഴിൽ-ബിസിനസ് അവസരങ്ങൾ സൃഷ്ടിക്കാനും ഇത് വഴിമൊരുക്കും.
കരാർ പൂർത്തിയായതിൽ സന്തോഷം പ്രകടിപ്പിച്ച മന്ത്രി മണീന്ദർ സിദ്ധു, കാനഡയുടെ വ്യാപാര മേഖലയെ കൂടുതൽ രാജ്യങ്ങളിലേക്ക് വ്യാപിപ്പിക്കുന്നതിന്റെ ഭാഗമാണ് ഈ കരാറെന്ന് വ്യക്തമാക്കി. യു.എ.ഇയിൽ കാനഡയുടെ ഏറ്റവും വലിയ കയറ്റുമതി വിപണിയാണ് നിലവിലുള്ളത്. 2025-ൽ ഇരുരാജ്യങ്ങളും തമ്മിലുള്ള ഉഭയകക്ഷി ചരക്ക് വ്യാപാരം 3.5 ബില്യൺ ഡോളറായി ഉയർന്നിരുന്നു. പുതിയ സാമ്പത്തിക കരാർ യാഥാർത്ഥ്യമാകുന്നതോടെ വ്യാപാര മൂല്യത്തിൽ കൂടുതൽ വൻ കുതിച്ചുചാട്ടം ഉണ്ടാകുമെന്നാണ് വിലയിരുത്തപ്പെടുന്നത്.
