നെക്സസ് (Nexus) ട്രാവൽ കാർഡുകൾക്ക് അപേക്ഷിക്കുന്ന കനേഡിയൻ പൗരന്മാർക്കായി പുതിയ സമയപരിധി കാനഡ ബോർഡർ സർവീസസ് ഏജൻസി പ്രഖ്യാപിച്ചു. 2027 ഏപ്രിൽ 1 മുതൽ നെക്സസ് കാർഡിന് അപേക്ഷിക്കുന്നവർ നിബന്ധനകളോടെയുള്ള അനുമതി (conditional approval) ലഭിച്ച് രണ്ട് വർഷത്തിനുള്ളിൽ എൻറോൾമെൻ്റ് ഇന്‍റർവ്യൂ ക്രമീകരിക്കണമെന്ന് ഏജൻസി അറിയിച്ചു. കോവിഡ് മഹാമാരിയെ തുടർന്നുള്ള കാലതാമസം കാരണം അഞ്ച് വർഷത്തേക്ക് താൽക്കാലികമായി നീട്ടിയ കാലാവധിയാണ് ഇപ്പോൾ വെട്ടിച്ചുരുക്കിയിരിക്കുന്നത്.
എൻറോൾമെൻ്റ് ഇന്‍റർവ്യൂകൾക്കായി കൂടുതൽ സൗകര്യങ്ങൾ ലഭ്യമായതിനെത്തുടർന്നാണ് രണ്ട് വർഷത്തെ പഴയ സമയപരിധി തിരികെ കൊണ്ടുവരുന്നതെന്ന് CBSA വ്യക്തമാക്കി. നിലവിൽ ഇന്‍റർവ്യൂനായി കാത്തിരിക്കുന്നവർ അപേക്ഷ കാലഹരണപ്പെടാതിരിക്കാൻ എത്രയും പെട്ടെന്ന് അപ്പോയിന്റ്മെൻ്റ് ബുക്ക് ചെയ്യണം. 2027 ഏപ്രിൽ 1-ന് മുമ്പ് അനുമതി ലഭിച്ച അപേക്ഷകർ അഞ്ച് വർഷത്തിനുള്ളിലോ അല്ലെങ്കിൽ 2029 ഏപ്രിൽ 1-നകമോ (ഏതാണ് ആദ്യം വരുന്നത് അതനുസരിച്ച്) ഇന്‍റർവ്യൂ പൂർത്തിയാക്കണം. അപേക്ഷ സമർപ്പിച്ചതിന് ശേഷം, Nexus യാത്രക്കാർ CBSA, യുഎസ് കസ്റ്റംസ് ആൻഡ് ബോർഡർ പ്രൊട്ടക്ഷൻ (CBP) ഉദ്യോഗസ്ഥരുമായി അഭിമുഖത്തിൽ പങ്കെടുക്കണം. വിരലടയാളം ശേഖരിക്കൽ, തിരിച്ചറിയൽ രേഖകളുടെ പരിശോധന, ചോദ്യം ചെയ്യൽ എന്നിവയാണ് അഭിമുഖത്തിൽ ഉണ്ടാവുക. കാനഡയ്ക്കും അമേരിക്കയ്ക്കുമിടയിൽ യാത്ര ചെയ്യുന്നവർക്ക് അതിർത്തി കടക്കുന്നത് വേഗത്തിലാക്കാനും പ്രത്യേക ക്ലിയറൻസ് ലഭിക്കാനും നെക്സസ് കാർഡുകൾ സഹായിക്കുന്നു.
