ഇന്ത്യ ആസ്ഥാനമായി പ്രവർത്തിക്കുന്ന ലോറൻസ് ബിഷ്ണോയി സംഘം കാനഡയ്ക്ക് ഭീഷിണിയാകുന്നു. കാനഡയിൽ വ്യാപകമാകുന്ന ഭീഷണിപ്പെടുത്തി പണം തട്ടൽ മാഫിയയുമായി ബന്ധപ്പെട്ട് പ്രവർത്തിക്കുന്ന ബിഷ്ണോയി സംഘത്തിന് കീഴിൽ ആയിരത്തോളം ഷൂട്ടർമാർ സജ്ജരാണെന്ന് വെളിപ്പെടുത്തിയ കത്ത് പുറത്തുവന്നു. 2025 ഓഗസ്റ്റിൽ അബോട്ട്സ്ഫോർഡ് പൊലീസിനാണ് സംഘം കത്തയച്ചത്. ഒരു ഗുണ്ടാസംഘാംഗത്തിൻ്റെ നാടുകടത്തലുമായി ബന്ധപ്പെട്ട ഹിയറിംഗിനിടെയാണ് കനേഡിയൻ പൊലീസ് ഓഫീസർ ഈ വിവരങ്ങൾ ഔദ്യോഗികമായി വെളിപ്പെടുത്തിയത്.
ലോറൻസ് ബിഷ്ണോയി സംഘം കാനഡയിൽ പ്രാദേശികമായി യുവാക്കളെ റിക്രൂട്ട് ചെയ്താണ് വിവിധ പ്രവിശ്യകളിൽ അക്രമങ്ങൾ അഴിച്ചുവിടുന്നത്. കാനഡയിലെ ബിസിനസുകാർ തങ്ങൾക്ക് കൃത്യമായി ‘നികുതി’ നൽകണമെന്നും, അല്ലാത്തപക്ഷം വെടിയുതിർക്കുമെന്നുമാണ് കത്തിലെ ഭീഷണി. ‘ഓപ്പറേഷൻ കമ്മ്യൂണിറ്റി ഷീൽഡ്’ പദ്ധതിയുടെ ഭാഗമായി ഈ കത്തിൻ്റെ വിശദാംശങ്ങൾ മറ്റ് സുരക്ഷാ ഏജൻസികൾക്ക് കൈമാറിയതായി അബോട്ട്സ്ഫോർഡ് പൊലീസ് സ്ഥിരീകരിച്ചു. പ്രധാനമായും ദക്ഷിണേഷ്യൻ വംശജരായ ബിസിനസുകാരെ വാട്സ്ആപ്പ് വഴിയാണ് ഇവർ ഭീഷണിപ്പെടുത്തുന്നത്. പണം നൽകാൻ വിസമ്മതിക്കുന്നവരുടെ വീടുകൾക്കും സ്ഥാപനങ്ങൾക്കും നേരെ വെടിയുതിർക്കും. ലോറൻസ് ബിഷ്ണോയി, ഗോൾഡി ബ്രാർ എന്നിവരുടെ പേരുകളിലാണ് ഭീഷണി.
അക്രമികളിൽ ഭൂരിഭാഗവും കനേഡിയൻ പൗരന്മാരല്ലാത്തതിനാൽ ഇവരെ നാടുകടത്തുക എന്നതാണ് പൊലീസ് ഇപ്പോൾ സ്വീകരിക്കുന്ന പ്രധാന മാർഗ്ഗം. മേയ് 7 വരെയുള്ള കണക്കനുസരിച്ച് ഇത്തരം കേസുകളുമായി ബന്ധപ്പെട്ട് 446 അന്വേഷണങ്ങൾ ആരംഭിക്കുകയും, 118 പേർക്ക് നാടുകടത്തൽ ഉത്തരവ് നൽകുകയും, 55 പ്രതികളെ ഇതിനകം നാടുകടത്തുകയും ചെയ്തിട്ടുണ്ട്.
