ഹംഗേറിയൻ ഗണിതശാസ്ത്രജ്ഞനായ പോൾ എർദോഷ് (Paul Erdős) 1946-ൽ ആദ്യമായി മുന്നോട്ടുവെച്ച ഒരു വെല്ലുവിളിക്കാണ് ഒപെൻഎഐയുടെ (OpenAI) ആഭ്യന്തര എഐ മോഡലുകളിൽ ഒന്ന് വിജയകരമായി പരിഹാരം കണ്ടെത്തിയിരിക്കുന്നത്. എഐയ്ക്ക് യഥാർത്ഥ ഗവേഷണങ്ങൾ നടത്താൻ കെല്പുണ്ടെന്നതിന്റെ സൂചനയാണ് ഈ നേട്ടമെന്ന് വിദഗ്ദ്ധർ വിലയിരുത്തുന്നു.

തലമുറകളായി ഗണിതശാസ്ത്രജ്ഞർ പരിഹരിക്കാൻ ശ്രമിച്ച് പരാജയപ്പെട്ട 80 വർഷത്തോളം പഴക്കമുള്ള ഒരു ഗണിതശാസ്ത്ര സമസ്യയ്ക്കാണ് കഴിഞ്ഞ മേയ് മാസത്തിൽ ആർട്ടിഫിഷ്യൽ ഇന്റലിജൻസ് (AI) മോഡൽ വിജയകരമായി പരിഹാരം കണ്ടത്. 1946-ൽ പോൾ എർദോഷ് ഉന്നയിച്ച ‘പ്ലാനർ യുണിറ്റ് ഡിസ്റ്റൻസ് പ്രോബ്ലം’ (planar unit distance problem) എന്ന വെല്ലുവിളിയാണ് ചാറ്റ്ജിപിറ്റിയുടെ നിർമ്മാതാക്കളായ ഒപെൻഎഐയുടെ ഒരു എഐ മോഡൽ പരിഹരിച്ചത്. ഇത്തരം വെല്ലുവിളികൾ സൃഷ്ടിക്കുന്നതിൽ പ്രശസ്തനായ അദ്ദേഹത്തിന്റെ ഈ കണ്ടെത്തലുകൾ പൊതുവെ “എർദോഷ് പ്രശ്നങ്ങൾ” (Erdős problems) എന്നാണ് അറിയപ്പെടുന്നത്.

എഐ മോഡലുകൾ ഗണിതശാസ്ത്ര പ്രശ്നങ്ങൾ പരിഹരിക്കുന്നു എന്ന അവകാശവാദങ്ങൾ പുതിയതല്ലെങ്കിലും, പലപ്പോഴും അവ വലിയ വിമർശനങ്ങൾക്കും സംശയങ്ങൾക്കും ഇടയാക്കാറുണ്ട്.

എന്നാൽ, ഈ പ്രത്യേക നേട്ടം മുൻപുള്ളവയിൽ നിന്നെല്ലാം തികച്ചും വ്യത്യസ്തമാണെന്ന് വിദഗ്ദ്ധർ പറയുന്നു. ഒരു മനുഷ്യനാണ് ഈ നേട്ടം കൈവരിച്ചിരുന്നതെങ്കിൽ, അത് ലോകത്തെ ഏറ്റവും മികച്ച ഒരു മാത്തമാറ്റിക്സ് ജേണലിൽ പ്രസിദ്ധീകരിക്കാൻ അർഹതയുള്ള ഒന്നാകുമായിരുന്നു എന്നാണ് അവരുടെ വിലയിരുത്തൽ. “ഇതിനുമുമ്പ് എഐ നിർമ്മിച്ച ഒരു തെളിവ് (proof) പോലും ഈയൊരു ഉയർന്ന നിലവാരത്തിന് അടുത്തെങ്ങും എത്തിയിട്ടില്ല,” എന്നാണ് കേംബ്രിഡ്ജ് സർവകലാശാലയിലെ ഗണിതശാസ്ത്രജ്ഞനായ ടിം ഗോവേഴ്‌സ് ഒപെൻഎഐയ്ക്ക് നൽകിയ കുറിപ്പിൽ വ്യക്തമാക്കിയത്.