കാൽഗറി: എയർഡ്രിയിൽ ലോറൻ ഷ്മിഡ്കെ എന്ന യുവതി തന്റെ സഹോദരിയുടെ വീട്ടിൽ നിന്നും അപൂർവ്വമായ ദൃശ്യം പകർത്തി. ബ്ലാക്ക് വിഡോ ചിലന്തിയുടെ ചിത്രമാണ് ലോറൻ പകർത്തിയത്. ഈ ചിത്രം കണ്ടതിന് ശേഷം ഇത് വെസ്റ്റേൺ ബ്ലാക്ക് വിഡോ എന്ന ചിലന്തിയിനമാണെന്നും ആൽബെർട്ടയിലെ വിഷമുള്ള ഒരേയൊരു ചിലന്തി ഇനമാണെന്നും ഓൾഡ്സ് കോളേജ് എന്റമോളജി ഇൻസ്ട്രക്ടർ കെൻ ഫ്രൈ സ്ഥിരീകരിച്ചു. ഉഗ്ര വിഷമുള്ള അപകടകാരിയായ ചിലന്തിയാണെന്നും ഇത് മനുഷ്യന് ആപത്തുണ്ടാക്കുമെന്നും അദ്ദേഹം പറഞ്ഞു.
ഒരു കടലയുടെ വലിപ്പം മാത്രമുള്ള ചിലന്തികൾ ആൽബെർട്ടയിലെ വരണ്ട ആവാസ വ്യവസ്ഥകളിൽ പ്രത്യേകിച്ച് ലെത്ത്ബ്രിഡ്ജ്, മെഡിസിൻ ഹാറ്റ് തുടങ്ങിയ സ്ഥലങ്ങളിലാണ് സാധാരണയായി കാണപ്പെടുന്നത്. കാൽഗറിയിൽ റിപ്പോർട്ട് ചെയ്യപ്പെടുന്ന ബ്ലാക്ക് വിഡോ ചിലന്തികൾ ചിലപ്പോൾ ബോറിയൽ കോംബ്ഫൂട്ട് പോലുള്ള സമാനമായ ചിലന്തികളായി തെറ്റിദ്ധരിക്കും. ആൽബെർട്ടയിൽ സാധാരണയായി കാണപ്പെടുന്ന ചിലന്തികൾക്ക് മനുഷ്യനെ ഉപദ്രവിക്കാൻ തക്ക ശക്തമായ വിഷമില്ലെന്ന് ഫ്രൈ പറയുന്നു. ബ്ലാക്ക് വിഡോയ്ക്ക് മാത്രമാണ് ന്യൂറോടോക്സിക് ഫലം ഉളവാക്കുന്ന വിഷമുള്ളതെന്നും ഫ്രൈ വ്യക്തമാക്കി.
