ഒന്റാരിയോ: കാനഡയിൽ റോബോട്ട് ട്രക്കുകൾ സജീവമാകാൻ പോകുന്നു. ഡ്രൈവറില്ലാത്ത ട്രക്കുകൾ ഇതിനോടകം കാനഡയുടെ നിരത്തുകളിൽ ഓടാൻ തുടങ്ങിക്കഴിഞ്ഞു. കാനഡയെ ഓട്ടോണമസ് ട്രക്കിങ്ങിൻ്റെ മുൻനിരയിലേക്ക് കൊണ്ടുവരുന്ന നിരവധി കമ്പനികളിൽ ഒന്നാണ് ഗാറ്റിക്. ആഭ്യന്തര സാങ്കേതികവിദ്യ ഉപയോഗിച്ച് പ്രവർത്തിക്കുന്ന സെൽഫ് സ്റ്റിയറിംഗ് ഹോളറുകൾ ഒൻ്റാരിയോയിൽ ഇതിനോടകം തന്നെ നിരത്തിലുണ്ട്.
പകൽ സമയത്ത്, ടൊറൻ്റോയ്ക്കും ഒൻ്റാരിയോയിലെ ബ്രാംപ്ടണിനും ഇടയിലാണ് ബോക്സ് ട്രക്ക് ഓടിക്കുന്നത്. രണ്ട് ഡസനിലധികം ക്യാമറകൾ, റഡാറുകൾ, ദൂരം അളക്കുന്ന ലേസർ അധിഷ്ഠിത “ലിഡാർ” എന്നിവ ഉപയോഗിച്ചാണ് ഈ വാഹനം പ്രവർത്തിക്കുന്നത്. എറ്റോബിക്കോക്കിലെ ഒരു സൂപ്പർമാർക്കറ്റിൻ്റെ വെയർഹൗസിൽ നിന്ന് 25 കിലോമീറ്റർ പടിഞ്ഞാറുള്ള കേന്ദ്രത്തിലേക്കാണ് ഈ ട്രക്ക് ദിവസവും പലചരക്ക് സാധനങ്ങൾ എത്തിക്കുന്നത്. പർപ്പിൾ നിറത്തിലുള്ള ലോഗോയുള്ള ട്രക്ക്, കാലിഫോർണിയ ആസ്ഥാനമായുള്ള ഒരു സ്വയംഭരണ ട്രക്കിംഗ് സ്ഥാപനമായ ഗാറ്റിക് ഇൻ‌കോർപ്പറേറ്റഡിൻ്റെ ഉടമസ്ഥതയിലുള്ളതാണ്.
സ്റ്റോറിൽ നിന്ന് 10 മിനിറ്റ് ഡ്രൈവ് അകലെയാണ് കമ്പനിയുടെ ഓഫീസ് പ്രവർത്തിക്കുന്നത്. അഞ്ച്, ആറ് വർഷമായി തങ്ങൾ കാനഡയിൽ പ്രവർത്തനം സജീവമാക്കി വരികയാണെന്ന് 2020 ൽ ലോബ്ലോയ്ക്കായി ആദ്യത്തെ സെൽഫ് ഡ്രൈവിംഗ് ട്രക്ക് സ്ഥാപിച്ച ഗാറ്റിക്കിൻ്റെ വക്താവ് റിച്ച് സ്റ്റെയ്‌നർ പറഞ്ഞു. ഒൻ്റാരിയോയിലുള്ള കമ്പനിയുടെ ആറ് ഇസുസു ബോക്സ് ട്രക്കുകളിൽ അഞ്ചെണ്ണം ലോബ്ലാ വിതരണ കേന്ദ്രത്തിൽ നിന്ന് ഗ്രേറ്റർ ടൊറൻ്റോ ഏരിയയിലെ ചില്ലറ വ്യാപാരികളിലേക്ക് സാധനങ്ങൾ കൊണ്ടുപോകുന്നുണ്ട്. വണ്ടി ഓടിക്കുന്നത് ഡ്രൈവർ അല്ലെങ്കിലും ഒരു സുരക്ഷാ ഡ്രൈവർ എല്ലാ ട്രക്കിലുമുണ്ട്.
