വാഷിങ്ടൺ : ചാരവിവാദത്തിനു പിന്നാല ലോകത്തെ പ്രമുഖ ചിപ്പ് നിര്‍മാതാക്കളായ എന്‍വിഡിയയുടെ സിഇഒയും സഹസ്ഥാപകനുമായ ജെന്‍സന്‍ ഹുവാങ്ങിനെ സ്ഥാനത്തുനിന്ന് നീക്കുമെന്ന് റിപ്പോര്‍ട്ട്. വിവാഹേതര ബന്ധങ്ങളുമായി ബന്ധപ്പെട്ട വിവാദവും ചൈനീസ് ചാരപ്രവര്‍ത്തനവുമായി ബന്ധപ്പെട്ട സംശയങ്ങളുമാണ് പ്രതിസന്ധിക്ക് കാരണമെന്ന്ണ് മാധ്യമങ്ങൾ റിപ്പോര്‍ട്ട് ചെയ്യുന്നു. രണ്ട് വിവാഹേതര ബന്ധങ്ങള്‍ ഹുവാങ്ങിനുണ്ടായിരുന്നുവെന്നും അതിലൊന്ന് ചൈനീസ് ചാരയെന്ന് സംശയിക്കുന്ന വ്യക്തിയുമായിരുന്നുവെന്നുമാണ് റിപ്പോര്‍ട്ടിലെ ആരോപണം. ഹുവാങ്ങിന്‍റെ ഭാവി സംബന്ധിച്ച് തീരുമാനമെടുക്കുന്നതിനായി കമ്പനി ഡയറക്ടര്‍ ബോര്‍ഡ് അടിയന്തിരമായി യോഗം ചേരാന്‍ തയ്യാറെടുക്കുന്നതായും റിപ്പോര്‍ട്ടില്‍ പറയുന്നു. അതേസമയം, ഹുവാങ്ങിന് കീഴില്‍ പ്രവര്‍ത്തിച്ചിരുന്ന ഒരു കമ്പനി എക്‌സിക്യൂട്ടീവുമായി അദ്ദേഹത്തിന് വിവാഹേതര ബന്ധമുണ്ടായിരുന്നുവെന്ന് ന്യൂയോര്‍ക്ക് ടൈംസും നേരത്തെ റിപ്പോര്‍ട്ട് ചെയ്തിരുന്നു.
അതേസമയം, പുറത്തുവന്ന റിപ്പോര്‍ട്ടുകളോട് എന്‍വിഡിയ ഔദ്യോഗികമായി പ്രതികരിച്ചിട്ടില്ല. ഹുവാങ്ങിനെ സ്ഥാനത്തുനിന്ന് നീക്കാനുള്ള നീക്കം സംബന്ധിച്ച വാര്‍ത്തകളെക്കുറിച്ച് കമ്പനിയുടെ നിലപാട് വ്യക്തമാക്കിയിട്ടില്ല. ഡയറക്ടര്‍ ബോര്‍ഡിന്‍റെ അന്വേഷണം പുരോഗമിക്കുന്ന സാഹചര്യത്തില്‍ കമ്പനിയുടെ നേതൃത്വത്തില്‍ മാറ്റമുണ്ടാകുമോയെന്ന കാര്യത്തില്‍ അനിശ്ചിതത്വം തുടരുകയാണ്. ചൈനീസ് ചാരപ്രവര്‍ത്തനവുമായി ബന്ധമുണ്ടെന്ന് യുഎസ് രഹസ്യാന്വേഷണ വിഭാഗം സംശയിക്കുന്ന വ്യക്തിയുമായുള്ള ബന്ധമാണ് വിഷയത്തെ കൂടുതല്‍ ഗൗരവമുള്ളതാക്കുന്നത്.
വിവാദങ്ങള്‍ക്കിടെ ഭാര്യയോടുള്ള വിശ്വസ്തത ലംഘിച്ചിരുന്നുവെന്ന് ഹുവാങ് സമ്മതിച്ചതായും റിപ്പോര്‍ട്ടുകളുണ്ട്. വിദേശ രഹസ്യാന്വേഷണ വിഭാഗത്തിന്‍റെ ലക്ഷ്യമായിരുന്നോ ഹുവാങ് എന്നതടക്കമുള്ള കാര്യങ്ങളില്‍ എന്‍വിഡിയയുടെ ഡയറക്ടര്‍ ബോര്‍ഡ് അന്വേഷണം നടത്തിവരികയാണ്. വിവാദ വാര്‍ത്തകള്‍ പുറത്തുവന്നതിന് പിന്നാലെ എന്‍വിഡിയ ഓഹരികളിലും ഇടിവുണ്ടായി. വിവാദത്തിനു ശേഷമുള്ള വ്യാപാരത്തില്‍ കമ്പനിയുടെ ഓഹരി വില ഏകദേശം എട്ട് ശതമാനം താഴ്ന്നു.ലോകത്തിലെ ഏറ്റവും മൂല്യമേറിയ ചിപ്പ് നിര്‍മാണ കമ്പനികളിലൊന്നായ എന്‍വിഡിയയെ ചുറ്റിപ്പറ്റിയുള്ള വിവാദം നിക്ഷേപകര്‍ക്കിടയിലും ആശങ്ക സൃഷ്ടിച്ചിട്ടുണ്ട്. എന്നാല്‍ ഹുവാങ്ങിനെ സ്ഥാനത്തുനിന്ന് നീക്കുമെന്ന റിപ്പോര്‍ട്ടുകള്‍ക്ക് ഔദ്യോഗിക സ്ഥിരീകരണം ലഭിച്ചിട്ടില്ല.
