ചെന്നൈ: ദക്ഷിണേന്ത്യൻ സംസ്ഥാനമായ തമിഴ്‌നാട്ടിലെ ആപ്പിൾ (Apple) ഐഫോൺ ഭാഗങ്ങൾ നിർമ്മിക്കുന്ന ടാറ്റ ഇലക്ട്രോണിക്സ് ഫാക്ടറിയിൽ മൂന്ന് കരാർ തൊഴിലാളികൾ മരിച്ചു. ചൈനയ്ക്ക് ശേഷം ആപ്പിളിന്റെ ഏറ്റവും പ്രധാനപ്പെട്ട നിർമ്മാണ കേന്ദ്രത്തിൽ ഉണ്ടാകുന്ന പുതിയ സുരക്ഷാ വീഴ്ചയാണിത്.
തിങ്കളാഴ്ച വൈകീട്ടോടെയാണ് അപകടമുണ്ടായത്. സംഭവത്തെക്കുറിച്ച് ആപ്പിൾ, ടാറ്റ, സംസ്ഥാന ഭരണകൂടം എന്നിവർ അന്വേഷണം നടത്തുമെന്ന് ഉദ്യോഗസ്ഥരും വ്യവസായ വൃത്തങ്ങളും അറിയിച്ചു. ഇന്ത്യയിലെ ഐഫോൺ അസംബ്ലിംഗിന്റെ 40 ശതമാനത്തോളം കൈകാര്യം ചെയ്യുന്നത് ടാറ്റ ഗ്രൂപ്പാണ്. ബാക്കി ഭാഗം ഫോക്‌സ്‌കോണാണ് (Foxconn) നിർമ്മിക്കുന്നത്. സമീപ മാസങ്ങളിൽ റാൻസംവെയർ ആക്രമണം, ജലമലിനീകരണ ആശങ്കകൾ തുടങ്ങി നിരവധി വെല്ലുവിളികൾ ടാറ്റയുടെ ഐഫോൺ നിർമ്മാണ മേഖല നേരിട്ടിരുന്നു. ലോകമെമ്പാടുമുള്ള ഐഫോണുകളുടെ 25 ശതമാനത്തോളം നിലവിൽ നിർമ്മിക്കുന്നത് ഇന്ത്യയിലാണ്.
തമിഴ്‌നാട്ടിലെ ഹൊസൂരിലുള്ള പ്ലാന്റിലെ മലിനജല ശുദ്ധീകരണ പ്ലാന്റിൽ (effluent treatment plant) അറ്റകുറ്റപ്പണികൾ നടത്തുന്നതിനിടെയാണ് തൊഴിലാളികൾ മരിച്ചതെന്ന് ഡിസ്ട്രിക്റ്റ് ഒഫീഷ്യൽ ദിനേശ് കുമാർ പറഞ്ഞു. യു.എസ് ആസ്ഥാനമായുള്ള ഇക്കോലാബിന്റെ (Ecolab) ഭാഗമായ ‘നാൽകോ വാട്ടർ’ (Nalco Water) ആണ് ഈ പ്ലാന്റ് പ്രവർത്തിപ്പിച്ചിരുന്നത്. ബാഹ്യ നാനോ-ഫിൽട്രേഷൻ ടാങ്ക് പരിശോധിക്കുന്നതിനിടെ വിഷവാതകം ശ്വസിച്ചാണ് അപകടമുണ്ടായതെന്ന് അദ്ദേഹം കൂട്ടിച്ചേർത്തു.
ഫാക്ടറിയിൽ നടന്ന അപകടത്തിൽ അനുശോചനം അറിയിച്ച തമിഴ്‌നാട് വ്യവസായ മന്ത്രി വിരുതൈമകൾ കീർത്തന, സംഭവത്തിൽ വിശദമായ അന്വേഷണം നടത്തുമെന്നും കുറ്റക്കാർക്കെതിരെ കർശന നടപടിയെടുക്കുമെന്നും എക്സിൽ (X) കുറിച്ചു. ദീപാവലി ആഘോഷങ്ങളുടെ ഭാഗമായി പ്ലാന്റ് അടച്ചിട്ടിരുന്നതിനാൽ ഈ സംഭവം ഉൽപ്പാദനത്തെ ബാധിച്ചിട്ടില്ല.
ടാറ്റയുടെ ഹൊസൂർ പ്ലാന്റിൽ ഇതിനുമുമ്പും നിരവധി തിരിച്ചടികൾ ഉണ്ടായിട്ടുണ്ട്. 2024-ൽ ഉണ്ടായ തീപിടുത്തത്തെ തുടർന്ന് ഇവിടെ ഉൽപ്പാദനം തടസ്സപ്പെട്ടിരുന്നു. കൂടാതെ, ഭൂഗർഭജല മലിനീകരണ ആരോപണങ്ങളെ തുടർന്ന് പ്ലാന്റ് അടച്ചുപൂട്ടാൻ സംസ്ഥാന അധികൃതർ മുന്നറിയിപ്പ് നൽകിയിരുന്നു. ഇത് കൂടാതെ, തൊട്ടടുത്തുള്ള ഐഫോൺ പ്ലാന്റിൽ ഉണ്ടായ റാൻസംവെയർ ആക്രമണത്തിൽ ആപ്പിളിന്റെ ഐഫോൺ 18 പ്രോ (iPhone 18 Pro) സംബന്ധിച്ച രേഖകൾ ചോർന്ന സംഭവവും ഉണ്ടായിരുന്നു.
