വിദേശികൾക്കും താൽക്കാലിക താമസക്കാർക്കും ആശ്വാസമേകി പുതിയ ഇമിഗ്രേഷൻ പ്ലാൻ കാനഡ പ്രഖ്യാപിച്ചു. രാജ്യാന്തര വിദ്യാർത്ഥികൾ ഉൾപ്പെടെയുള്ള താൽക്കാലിക താമസക്കാരുടെ എണ്ണം കുറയ്ക്കുക, നിലവിൽ രാജ്യത്തുള്ള യോഗ്യരായ തൊഴിലാളികൾക്ക് സ്ഥിരതാമസം ഉറപ്പുവരുത്തുക തുടങ്ങിയ ലക്ഷ്യങ്ങളോടെയാണ് പുതിയ ഇമിഗ്രേഷൻ പ്ലാൻ അവതരിപ്പിച്ചിരിക്കുന്നത്. 2027 മുതൽ 2029 വരെയുള്ള കാലയളവിൽ പ്രതിവർഷം 3.8 ലക്ഷം പേർക്ക് വീതം സ്ഥിരതാമസവും 3.7 ലക്ഷം പേർക്ക് പുതിയ താൽക്കാലിക വീസയും നൽകും.
പുതിയ നയം അനുസരിച്ച് 2027-ൽ രാജ്യത്തേക്ക് നേരിട്ടെത്തുന്ന സ്ഥിരതാമസക്കാരുടെ പരിധി പരമാവധി 4,22,000 ആയി നിശ്ചയിച്ചിട്ടുണ്ട്. താൽക്കാലികമായി കാനഡയിലുള്ള രണ്ട് ലക്ഷം പേർക്ക് പി.ആർ നൽകുന്ന പദ്ധതിയിൽ ഒരു ലക്ഷം അവസരങ്ങൾ എക്സ്പ്രസ് എൻട്രി, പ്രൊവിൻഷ്യൽ നോമിനി പ്രോഗ്രാം വഴി വിദഗ്ധരായ തൊഴിലാളികൾക്കായി നീക്കിവെക്കും. കൂടാതെ, 2026-2027 ഇമിഗ്രേഷൻ പ്ലാനിൽ പ്രഖ്യാപിച്ച പ്രത്യേക പദ്ധതി പ്രകാരം അവശേഷിക്കുന്ന അഭയാർത്ഥികൾക്കും തൊഴിലാളികൾക്കും പി.ആർ അനുവദിക്കുന്നത് തുടരും. 2028, 2029 വർഷങ്ങളിലും സമാനമായ രീതിയിൽ തന്നെ സ്ഥിരതാമസ അനുമതി നൽകാനാണ് തീരുമാനം.
2027-ൽ 3.7 ലക്ഷം താൽക്കാലിക പ്രവേശന അനുമതികളാണ് നൽകുക. ഇതിൽ 2,20,000 താൽക്കാലിക വിദേശ തൊഴിലാളികൾക്കും 1,50,000 അന്താരാഷ്ട്ര വിദ്യാർത്ഥികൾക്കുമാണ് അവസരം. ഇതിനുപുറമേ, ക്യുബെക്കിന് പുറത്തുള്ള പ്രദേശങ്ങളിൽ ഫ്രഞ്ച് ഭാഷ സംസാരിക്കുന്ന സ്ഥിരതാമസക്കാരുടെ നിരക്ക് 2027-ൽ 9.5 ശതമാനത്തിൽ നിന്ന് 2029-ഓടെ 12 ശതമാനമായി ഉയർത്താനും സർക്കാർ പദ്ധതിയിടുന്നുണ്ട്.
