അമേരിക്കൻ ടെലികോം വിപണിയിൽ വിപ്ലവകരമായ മാറ്റങ്ങൾ ലക്ഷ്യമിട്ട് ഇലോൺ മസ്കിന്റെ ബഹിരാകാശ ഗവേഷണ സ്ഥാപനമായ സ്‌പേസ് എക്‌സ് രംഗത്ത്. രാജ്യത്തുടനീളം 5ജി മൊബൈൽ നെറ്റ്‌വർക്ക് ശൃംഖല കെട്ടിപ്പടുക്കുന്നതിനായി പ്രമുഖ ചിപ്പ് നിർമ്മാണ കമ്പനിയായ ക്വാൽകോം ടെക്നോളജീസുമായി സ്‌പേസ് എക്‌സ് കൈകോർത്തു. നവംബർ നാലിനാണ് ഈ വമ്പൻ ബഹുവർഷ കരാറിനെക്കുറിച്ചുള്ള വിവരങ്ങൾ ക്വാൽകോം ഔദ്യോഗികമായി പുറത്തുവിട്ടത്.
സ്‌പേസ് എക്‌സിന്റെ ‘സ്റ്റാർലിങ്ക് മൊബൈൽ’ സംരംഭത്തിന്റെ ഭാഗമായാണ് ഈ പുതിയ ശൃംഖല നിലവിൽ വരുന്നത്. സാറ്റലൈറ്റ് അധിഷ്ഠിത സേവനങ്ങളെ നിലവിലുള്ള സെല്ലുലാർ ടവറുകളുമായി സമർത്ഥമായി സംയോജിപ്പിച്ചായിരിക്കും ഇത് പ്രവർത്തിക്കുക. അമേരിക്കയിലുടനീളം പതിനായിരക്കണക്കിന് 5ജി ടവറുകൾ നിർമ്മിക്കാൻ ലക്ഷ്യമിടുന്ന ഈ പദ്ധതിയുടെ ആദ്യ ഘട്ട പ്രവർത്തനങ്ങൾ 2027-ഓടെ ആരംഭിക്കുമെന്നാണ് പ്രതീക്ഷിക്കുന്നത്.
ക്വാൽകോമിന്റെ ഏറ്റവും പുതിയ ‘ഡ്രാഗൺവിങ് QRU100’, ‘QDU100′ പ്ലാറ്റ്‌ഫോമുകളെ അടിസ്ഥാനമാക്കിയാണ് ഈ നെറ്റ്‌വർക്ക് പ്രവർത്തിക്കുന്നത്. നെറ്റ്‌വർക്ക് ശേഷി വർദ്ധിപ്പിക്കുന്നതിനായി ’64T64R മാസീവ് മിമോ’ സാങ്കേതികവിദ്യയും ഉപയോഗപ്പെടുത്തുന്നുണ്ട്. ഇതിലൂടെ ഒരേസമയം കൂടുതൽ ആളുകളിലേക്ക് വേഗതയേറിയ കണക്റ്റിവിറ്റി എത്തിക്കാനും, സിഗ്നൽ വ്യാപ്തി കൂട്ടാനും, വൈദ്യുതി ഉപയോഗം കാര്യക്ഷമമായി കുറയ്ക്കാനും സാധിക്കുമെന്ന് കമ്പനികൾ അവകാശപ്പെടുന്നു.
