മനസ്സിന് കുളിർമയേകുന്ന സായാഹ്നങ്ങൾ; പൂത്തൻവേലിക്കര പാലം ഇനി യുവാക്കളുടെ ഇഷ്ടയിടം
എറണാകുളം – തൃശൂർ ജില്ലകളുടെ അതിർത്തിയിൽ, പെരിയാറും ചാലക്കുടിപ്പുഴയും സംഗമിക്കുന്ന മനോഹരമായ തീരപ്രദേശമാണ് പുത്തൻവേലിക്കര. 1975-ൽ പുറത്തിറങ്ങിയ ഐ.വി. ശശിയുടെ കന്നിചിത്രമായ ‘ഉത്സവം’ മൂലം ശ്രദ്ധനേടിയ ഈ ഗ്രാമം അന്ന് നേരിട്ടിരുന്ന രൂക്ഷമായ കുടിവെള്ളക്ഷാമത്തെക്കുറിച്ചാണ് ജനങ്ങൾക്കിടയിൽ അറിയപ്പെട്ടിരുന്നത്. എന്നാൽ അരനൂറ്റാണ്ടിനിപ്പുറം ആ പ്രതിസന്ധികളെയെല്ലാം തരണം ചെയ്ത്, പാലിയത്തിന്റെ ചരിത്രപ്പഴമയും പച്ചപ്പു നിറഞ്ഞ പാടശേഖരങ്ങളും പേറി വിനോദസഞ്ചാരത്തിന്റെ പുത്തൻ സാധ്യതകളിലേക്ക് ഈ പ്രദേശം മുന്നേറുകയാണ്.
ഒരു കാലത്ത് യാത്ര സൗകര്യങ്ങളുടെ കുറവു മൂലം പുറംലോകത്ത് നിന്ന് ഒറ്റപ്പെട്ടു കിടന്ന ഇവിടേക്ക് എത്താൻ മഞ്ഞാലി, കണക്കൻകടവ്, ഇളന്തിക്കര വഴി ഏറെ ദൂരം സഞ്ചരിക്കേണ്ടിയിരുന്നു. എന്നാൽ 2018-ൽ ഉദ്ഘാടനം ചെയ്യപ്പെട്ട സ്റ്റേഷൻകടവ് പാലം ഗതാഗതം സുഗമമാക്കുക മാത്രമല്ല ചെയ്തത്, 2018-ലെ മഹാപ്രളയത്തിൽ ആയിരക്കണക്കിന് ജനങ്ങൾക്ക് സുരക്ഷിത താവളമൊരുക്കിയും രക്ഷാപ്രവർത്തനങ്ങൾക്ക് തുണയായുമൊരു ജീവനാഡിയായി മാറി. പ്രളയ അതിജീവനത്തിന്റെ ഓർമ്മകൾ തുടിക്കുന്ന ഈ പാലം ഇന്ന് വൈകുന്നേരങ്ങളിൽ കൊച്ചിയിൽ നിന്നും പറവൂരിൽ നിന്നും എത്തുന്ന ആളുകൾക്ക് പ്രകൃതിഭംഗിയും കുളിർകാറ്റും ആസ്വദിക്കാനുള്ള പ്രധാന കേന്ദ്രമാണ്.
പാലത്തിനടുത്തായി പെരിയാറിലെ മാളവന ശിവക്ഷേത്രത്തോട് ചേർന്ന് ഉയർന്നുനിൽക്കുന്ന കൂറ്റൻ മാളവനപ്പാറ സഞ്ചാരികൾക്ക് വേറിട്ടൊരു കാഴ്ച സമ്മാനിക്കുന്നു. കൂടാതെ, പ്രഭാതങ്ങളിൽ ആമ്പൽ പൂക്കൾ പൂത്തുനിൽക്കുന്ന താഴഞ്ചിറ പാടശേഖരം സോഷ്യൽ മീഡിയയിൽ വലിയ തരംഗമായി മാറുകയും, കടമക്കുടിയെയും കുമ്പളങ്ങിയെയും പോലെ നാടൻ സായാഹ്ന ഭംഗി തേടിയെത്തുന്ന സഞ്ചാരികളുടെ പ്രിയപ്പെട്ട ഇടമായി മാറുകയും ചെയ്തിട്ടുണ്ട്. കുടിവെള്ളമില്ലാത്ത ഗ്രാമമെന്ന പഴയ പ്രതിച്ഛായ മാറ്റി പ്രകൃതിഭംഗിയും അതിജീവന ചരിത്രവും കൊണ്ട് എറണാകുളത്തിന്റെ ടൂറിസം ഭൂപടത്തിൽ ഇന്ന് പുത്തൻവേലിക്കര തനതായൊരിടം ഉറപ്പിച്ചു കഴിഞ്ഞു.
