ഓഗസ്റ്റിൽ കാർ യാത്രയ്ക്കിടയിൽ 7 വയസ്സുകാരനായ കുട്ടി തന്നോട് അസഭ്യം പറഞ്ഞതിനെത്തുടർന്ന്, ശിക്ഷയെന്ന നിലയിൽ ‘ഡാനിയൽ ഷെർഗൻ’ (34) എന്നയാൾ കുട്ടിയുടെ വായിലേക്ക് സോപ്പ് ബലമായി തിരുകാൻ ശ്രമിക്കുകയായിരുന്നുവെന്ന് പീപ്പിൾ (People) മാസിക പരിശോധിച്ച സത്യവാങ്മൂലത്തിൽ വ്യക്തമാക്കുന്നു. തന്റെ കാമുകിക്കും നാല് കുട്ടികൾക്കുമൊപ്പം കാറിൽ യാത്ര ചെയ്യുമ്പോഴാണ് കുട്ടി പ്രശ്നമുണ്ടാക്കാൻ തുടങ്ങിയതെന്ന് ഷെർഗൻ പോലീസിനോട് പറഞ്ഞു. യാത്രയ്ക്കിടയിൽ ഡങ്കിൻ (Dunkin’) ഔട്ട്‌ലെറ്റിലേക്ക് പോകുന്നതിനിടെ, കാറിന്റെ പിൻസീറ്റിലിരുന്ന കുട്ടി മറ്റൊരു കുട്ടിയെ തല്ലാൻ തുടങ്ങി. ഇത് തടയാനായി ഷെർഗൻ പിൻസീറ്റിലേക്ക് കൈ നീട്ടിയപ്പോഴാണ് കുട്ടി ഷെർഗന് നേരെ കടുത്ത അസഭ്യവർഷം നടത്തിയത്.
ഇതോടെ കാർ ഒരു ഡോളർ ജനറൽ (Dollar General) സ്റ്റോറിന് മുന്നിൽ നിർത്തിയ ഷെർഗൻ, കാമുകിയോട് കടയിൽ കയറി ഒരു സോപ്പ് വാങ്ങി വരാൻ ആവശ്യപ്പെട്ടു. തുടർന്ന് ഈ സോപ്പ് കുട്ടിയുടെ വായിലേക്ക് ബലമായി തിരുകാൻ ശ്രമിക്കുകയും ഇതിനിടയിൽ കുട്ടിയുടെ നെറ്റിയിൽ അബദ്ധത്തിൽ അടിക്കുകയും ചെയ്തു. സംഭവത്തിന് ശേഷം കുട്ടിയുടെ വലത് ചെവിയിൽ ചതവും മുഖത്തിന്റെ വലതുഭാഗത്ത് ചുവന്ന പാടും ഉണ്ടായിരുന്നു. കുട്ടി തല കാർ സീറ്റിൽ അമർത്തിപ്പിടിച്ചപ്പോഴാണ് ഇത് സംഭവിച്ചതെന്നാണ് ഷെർഗൻ പോലീസിനോട് പറഞ്ഞത്. കുട്ടിയുടെ മുറിവിൽ നിന്ന് രക്തം വരാൻ തുടങ്ങിയതോടെ ഷെർഗന്റെ കാമുകി പ്രഥമശുശ്രൂഷ നൽകി.
ലാപോർട്ട് കൗണ്ടി ഷെരീഫ് ഓഫീസ് ചോദ്യം ചെയ്തപ്പോൾ, കുട്ടിയുടെ ചെവിയിൽ എങ്ങനെയാണ് ചതവുണ്ടായതെന്ന് തനിക്ക് അറിയില്ലെന്നാണ് ഷെർഗൻ അധികൃതരോട് പറഞ്ഞത്. കുട്ടിക്ക് പെട്ടെന്ന് ദേഷ്യം വരുന്ന സ്വഭാവമുണ്ടെന്നും മറ്റ് കുട്ടികളെ തല്ലിയതിന് അടുത്തിടെ സ്‌കൂളിൽ നിന്ന് സസ്‌പെൻഡ് ചെയ്തിരുന്നുവെന്നും ഇയാൾ പോലീസിനോട് പറഞ്ഞു. ഗാർഹിക പീഡനത്തിന് (domestic battery) കേസ് എടുത്ത ഷെർഗനെ 750 ഡോളർ ബോണ്ടിൽ ജാമ്യത്തിൽ വിട്ടയച്ചതായി കോടതി രേഖകൾ വ്യക്തമാക്കുന്നു. കേസിന്റെ തുടർ വിചാരണയ്ക്കായി ജനുവരി 6-ന് ഇയാൾ കോടതിയിൽ ഹാജരാകേണ്ടതുണ്ട്.
