രഹസ്യ വിവരങ്ങൾ പങ്കുവെക്കാൻ 222-TIPS എന്ന നമ്പറിൽ ബന്ധപ്പെടാൻ ജനങ്ങളോട് അഭ്യർത്ഥന. കനേഡിയൻ ക്രൈം സ്റ്റോപ്പേഴ്സ് അസോസിയേഷൻ (CCSA) തങ്ങളുടെ പ്രാദേശിക ശാഖകളോട് ഇനിമുതൽ ഓൺലൈൻ വഴി വിവരങ്ങൾ ശേഖരിക്കുന്നത് നിർത്തിവെക്കാനും, ഫോൺ കോളുകൾ വഴി മാത്രം വിവരങ്ങൾ സ്വീകരിക്കാനും നിർദ്ദേശം നൽകി. സി.ബി.സി ന്യൂസിന് (CBC News) നൽകിയ ഔദ്യോഗിക പ്രസ്താവനയിലാണ് സംഘടന ഇക്കാര്യം വ്യക്തമാക്കിയത്. മാർച്ച് മാസത്തിൽ വലിയ രീതിയിലുള്ള ഡാറ്റ ചോർച്ച നേരിട്ട യു.എസ് കമ്പനിയായ ‘നാവിഗേറ്റ് 360’യുടെ (Navigate360) ‘P3’ പ്ലാറ്റ്‌ഫോം ഒഴിവാക്കി, താൽക്കാലികമായി ഫോൺ അധിഷ്ഠിത സംവിധാനത്തിലേക്ക് മാറാനാണ് ഈ തീരുമാനം.
നേരത്തെ ഡാറ്റ ചോർച്ചയെക്കുറിച്ച് പൊതുജനങ്ങൾ അന്വേഷിച്ചാൽ, നാവിഗേറ്റ് 360-യുടെ സുരക്ഷാ ക്രമീകരണങ്ങളിൽ വിശ്വാസം പ്രകടിപ്പിക്കാനും ആ പ്ലാറ്റ്‌ഫോം തുടർ ഉപയോഗത്തിന് സുരക്ഷിതമാണെന്ന് അറിയിക്കാനുമായിരുന്നു സംഘടന നൽകിയ നിർദ്ദേശം. എന്നാൽ വെള്ളിയാഴ്ച പുറത്തിറക്കിയ പുതിയ തീരുമാനം ഇതിൽ നിന്നുള്ള വ്യക്തമായ മാറ്റമാണ് സൂചിപ്പിക്കുന്നത്. രഹസ്യ വിവരങ്ങൾ കൈമാറാൻ പൊതുജനങ്ങൾ 222-TIPS എന്ന ഫോൺ നമ്പറിലേക്ക് വിളിക്കണമെന്ന് പ്രസ്താവനയിൽ അഭ്യർത്ഥിച്ചു. പ്രവർത്തനങ്ങൾ താത്കാലികമായി നിർത്തിവെച്ച പ്രാദേശിക കേന്ദ്രങ്ങളിൽ ഫോൺ വഴിയുള്ള വിവരശേഖരണം എപ്പോൾ പുനരാരംഭിക്കും എന്ന കാര്യം ഉടൻ പ്രാദേശികമായി അറിയിക്കും. “പ്രാദേശിക പ്രോഗ്രാമുകൾ വഴി ലഭിക്കുന്ന പുതിയ വിവരങ്ങൾ പൂർണമായും ഞങ്ങളുടെ നിയന്ത്രണത്തിൽ സൂക്ഷിക്കുകയും നിയമപാലകർക്ക് സുരക്ഷിതമായി കൈമാറുകയും ചെയ്യും,” സി.സി.എസ്.എ പ്രസിഡന്റ് ഡേവിഡ് ജെ. ഫോർസ്റ്റർ പറഞ്ഞു. “ഇതിനകം ചോർന്നുപോയ വിവരങ്ങളുടെ ആഘാതം തിരിച്ചുപിടിക്കാൻ ഈ മാറ്റത്തിന് കഴിയില്ലെങ്കിലും, നാവിഗേറ്റ് 360-യിൽ നിന്ന് ഉത്തരങ്ങൾ തേടുന്നത് ഞങ്ങൾ തുടരും. ഒപ്പം, കുറ്റകൃത്യങ്ങൾ തടയാനും തെളിയിക്കാനും സമൂഹത്തെ സഹായിച്ചുപോന്ന ഈ സംവിധാനത്തിലുള്ള ജനവിശ്വാസം വീണ്ടെടുക്കാൻ ഞങ്ങൾ പ്രവർത്തിക്കും.”
കഴിഞ്ഞ ആഴ്ച സി.ബി.സി നടത്തിയ അന്വേഷണത്തിലാണ് ഡാറ്റ ചോർച്ചയുടെ വ്യാപ്തി പുറത്തുവന്നത്. കഴിഞ്ഞ 25 വർഷത്തിനിടെ കനേഡിയൻ ക്രൈം സ്റ്റോപ്പേഴ്സ് പ്രോഗ്രാമുകളിലേക്ക് ലഭിച്ച 15 ലക്ഷത്തിലധികം (1.5 million) രഹസ്യ വിവരങ്ങളാണ് ഹാക്ക് ചെയ്യപ്പെട്ടത്. ഇതുവരെ 40-ലധികം പ്രാദേശിക ക്രൈം സ്റ്റോപ്പേഴ്സ് ശാഖകളും അഞ്ച് പ്രൊവിൻസുകളിലെ പോലീസ് ഏജൻസികളും രഹസ്യ വിവരങ്ങൾ സ്വീകരിക്കുന്നത് താത്കാലികമായി നിർത്തിവെക്കുകയോ സംഘടനയുമായുള്ള സഹകരണം അവസാനിപ്പിക്കുകയോ ചെയ്തിട്ടുണ്ട്. അതേസമയം, മാർച്ച് മാസത്തിൽ നടന്ന ഹാക്കിംഗിന്റെ പശ്ചാത്തലത്തിൽ നാവിഗേറ്റ് 360 നൽകിയ സുരക്ഷാ മാനദണ്ഡങ്ങളെക്കുറിച്ച് പ്രൈവസി കമ്മീഷണർ അന്വേഷണം ആരംഭിച്ചിട്ടുണ്ട്. “ജനങ്ങളുടെ വിശ്വാസ്യതയുടെ കാര്യത്തിൽ ക്രൈം സ്റ്റോപ്പേഴ്സിന് പഴയ നിലയിലേക്ക് തിരിച്ചെത്താൻ കഴിയുമോ എന്ന് സംശയമാണ്,” ഒന്റാറിയോയിലെ വിൻഡ്സർ സർവകലാശാലയിലെ ക്രിമിനോളജി പ്രൊഫസറായ റാൻഡി ലിപ്പർട്ട് അഭിപ്രായപ്പെട്ടു.
ഒരു മാധ്യമം വഴിയും വിവരങ്ങൾ സ്വീകരിക്കാത്ത 13 കേന്ദ്രങ്ങൾ
വിവരങ്ങൾ ചോർന്നതായി കണ്ടെത്തിയ 64 ക്രൈം സ്റ്റോപ്പേഴ്സ് ചാപ്റ്ററുകളുമായി സി.ബി.സി ബന്ധപ്പെടാൻ ശ്രമിച്ചിരുന്നു. ഇതിൽ ഒന്റാറിയോയിലെയും സസ്കാച്ചെവാനിലെയും 13 ക്രൈം സ്റ്റോപ്പേഴ്സ് പ്രോഗ്രാമുകൾ ഇനി ഒരു തരത്തിലുള്ള രഹസ്യ വിവരങ്ങളും സ്വീകരിക്കില്ലെന്ന് അറിയിച്ചു. ഒന്റാറിയോയിലെ ബ്രാന്റ്-ബ്രാന്റ്ഫോർഡ് ക്രൈം സ്റ്റോപ്പേഴ്സ് ചാപ്റ്ററാണ് തങ്ങളുടെ ഫേസ്ബുക്ക് പേജിലൂടെ ഈ തീരുമാനം ഒടുവിലായി അറിയിച്ചത്.
