ന്യൂയോർക്കിലെ ഒരു ആശുപത്രിക്ക് പുറത്ത് ഫെഡറൽ ഏജന്റിന്റെ വെടിയേറ്റു ചികിത്സയിലുള്ള ക്രിമിനൽ പശ്ചാത്തലമുള്ള കുടിയേറ്റക്കാരന്റെ മോചനം ആവശ്യപ്പെട്ട് പ്രതിഷേധിച്ചവരും പോലീസും തമ്മിൽ സംഘർഷം. ബ്രോങ്ക്സിലെ ന്യൂയോർക്ക്-പ്രസ്ബിറ്റീരിയൻ അലൻ ആശുപത്രിക്ക് പുറത്ത് വ്യാഴാഴ്ച രാത്രിയാണ് ഏകദേശം മുന്നൂറോളം പ്രതിഷേധക്കാരും എൻവൈപിഡി പോലീസും ഏറ്റുമുട്ടിയത്. മാർബിൾ ഹിൽ പ്രദേശത്ത് വെച്ച് ഫെഡറൽ ഏജന്റിന്റെ വെടിയേറ്റ ഡൊമിനിക്കൻ റിപ്പബ്ലിക് സ്വദേശിയായ 28 കാരൻ ഓസ്കാർ ബെൽഗലിനെ പ്രവേശിപ്പിച്ച സ്ഥലത്താണ് പ്രതിഷേധം അരങ്ങേറിയത്. “ഞങ്ങളുടെ തെരുവുകളിൽ നിന്ന് ഐസിഇ പുറത്തുപോകണം,” “പലസ്തീൻ മുതൽ മെക്സിക്കോ വരെ, മതിലുകൾ തകരണം” തുടങ്ങിയ മുദ്രാവാക്യങ്ങളുമായി മുഖംമൂടികളും കഫിയേകളും ധരിച്ചെത്തിയ പ്രക്ഷോഭകർ തെരുവ് കയ്യേറി.

പ്രതിഷേധക്കാരെ തടയാൻ പോലീസ് ബാരിക്കേഡുകൾ തീർത്തെങ്കിലും, പ്രക്ഷോഭകർ ബാരിക്കേഡുകൾ പിടിച്ച് തള്ളുകയും വലിയ ഉന്തുംതള്ളുമുണ്ടാകുകയും ചെയ്തു. സംഘർഷത്തിനിടയിൽ ഡെമോക്രാറ്റിക് കോൺഗ്രസ് നോമിനി ഡാരിയലിസ അവില ഷെവലിയർ തള്ളിയിടപ്പെട്ടു. സംഭവവുമായി ബന്ധപ്പെട്ട് കുറഞ്ഞത് അഞ്ച് പ്രതിഷേധക്കാരെയെങ്കിലും പോലീസ് കസ്റ്റഡിയിലെടുത്തതായി എൻവൈപിഡി സ്ഥിരീകരിച്ചു. ആശുപത്രിക്ക് പുറത്ത് പ്രതിഷേധം ശക്തമായി തുടരുന്നതിനിടയിൽ, വെടിയേറ്റു കഴുത്തിന് പരിക്കേറ്റ ബെൽഗൽ ചികിത്സയ്ക്ക് ശേഷം സുഖം പ്രാപിച്ചുവരികയാണ്.

ഡൊമിനിക്കൻ റിപ്പബ്ലിക് സ്വദേശിയായ ബെൽഗലിന് ട്രിനിറ്റാരിയോസ് ഗുണ്ടാസംഘവുമായി ബന്ധമുണ്ടെന്ന് ഹോംലാൻഡ് സെക്യൂരിറ്റി ഡിപ്പാർട്ട്മെന്റ് വ്യക്തമാക്കി. വ്യാഴാഴ്ച വൈകുന്നേരം 4 മണിയോടെ മാർബിൾ ഹിൽ അവന്യൂവിൽ വെച്ച്, കാറിൽ പിൻസീറ്റിൽ കുട്ടിയുണ്ടായിരുന്ന സമയത്ത് ഇയാളെ അറസ്റ്റ് ചെയ്യാൻ ഫെഡറൽ ഉദ്യോഗസ്ഥർ ശ്രമിക്കുന്നതിനിടയാണ് വെടിവെപ്പുണ്ടായത്. ബെൽഗലിന്റെ ഒപ്പമുണ്ടായിരുന്ന അഞ്ച് വയസ്സുകാരനായ കുട്ടിക്ക് പരിക്കുകളില്ലാതെ രക്ഷപ്പെട്ടു. പിന്നീട് കറുത്ത ഗ്ലാസുകളിട്ട വാഹനത്തിൽ ഇയാളെ രഹസ്യമായി മാറ്റുന്നതിനിടയിലും പ്രതിഷേധക്കാർ എസ്‌യുവിലേക്ക് കല്ലുകളും കുപ്പികളും എറിഞ്ഞു.

അനധികൃത കുടിയേറ്റക്കാരനായ ബെൽഗലിന് ഗ്രാന്റ് ലാഴ്സി കേസിൽ മുൻപ് ശിക്ഷാവിധിയുണ്ടെന്നും, കൊള്ളയടിക്കൽ, മയക്കുമരുന്ന്, ആയുധങ്ങൾ കൈവശം വെക്കൽ തുടങ്ങിയ നിരവധി കുറ്റകൃത്യങ്ങളിൽ പങ്കുണ്ടെന്നും ഡിഎച്ച്എസ് വെളിപ്പെടുത്തി. ഡെമോക്രാറ്റിക് സാൻക്ച്വറി നയങ്ങൾ കാരണം 2023-ൽ അറസ്റ്റിലായ ഇയാൾ അന്ന് വേഗത്തിൽ മോചിപ്പിക്കപ്പെടുകയായിരുന്നുവെന്നും അധികൃതർ ആരോപിച്ചു. കൊള്ളയടിക്കൽ കേസിൽ അഞ്ച് വർഷത്തെ പ്രൊബേഷനും, നിലവിൽ വിചാരണ നേരിടുന്ന മറ്റൊരു മയക്കുമരുന്ന് കേസും അടക്കം രണ്ട് മുൻകാല അറസ്റ്റുകൾ ബെൽഗലിന്റെ പേരിലുണ്ടെന്ന് എൻവൈപിഡി സ്ഥിരീകരിച്ചിട്ടുണ്ട്.