മെക്സിക്കോ ഉൾക്കടലിൽ രൂപപ്പെട്ട ‘കാറ്റഗറി 2’ ചുഴലിക്കാറ്റ് ‘ഇസയാസ്’ താങ്ക്സ്ഗിവിങ് വാരാന്ത്യത്തിൽ കാനഡയിലുടനീളമുള്ള കാലാവസ്ഥാ സാഹചര്യങ്ങളെ ബാധിക്കുമെന്ന് കാലാവസ്ഥാ നിരീക്ഷകർ പ്രവചിക്കുന്നു. മണിക്കൂറിൽ 130 കിലോമീറ്റർ വേഗത്തിൽ വീശിയടിക്കുന്ന ‘ഇസയാസ്’ ചുഴലിക്കാറ്റ് ഈ സീസണിലെ ആദ്യത്തെ അറ്റ്ലാൻ്റിക് ചുഴലിക്കാറ്റായി മാറുമെന്നു പ്രതീക്ഷിക്കുന്നു. ചുഴലിക്കാറ്റ് കര തൊടുന്നതോടെ ചിലയിടങ്ങളിൽ 177 മില്ലിമീറ്ററിലധികം വരെ കനത്ത മഴയും രണ്ട് മീറ്ററിലധികം ഉയരത്തിൽ തിരമാലയും ഉണ്ടാകുമെന്ന് കാലാവസ്ഥാ വകുപ്പും പ്രവചിക്കുന്നു.
കാനഡയിൽ ‘ഇസയാസ്’ ചുഴലിക്കാറ്റിനെ തുടർന്ന് വാരാന്ത്യത്തിൽ കനത്ത മഴയും ശക്തമായ കാറ്റും പ്രതീക്ഷിക്കുന്നു. ന്യൂഫിൻലൻഡ് ആൻഡ് ലാബ്രഡോറിലും മാരിടൈംസ് പ്രവിശ്യകളിലും താപനില കുറയാൻ സാധ്യതയുണ്ട്. അറ്റ്ലാൻ്റിക് മേഖലയിൽ ശക്തമായ കാറ്റ് വീശാൻ സാധ്യതയുണ്ടെന്നും ന്യൂബ്രൺസ്വിക്, നോവസ്കോഷ, പടിഞ്ഞാറൻ ന്യൂഫിൻലൻഡ് എന്നിവിടങ്ങളിൽ കനത്ത മഴയും പ്രതീക്ഷിക്കാമെന്നും കാലാവസ്ഥാ നിരീക്ഷകർ അറിയിച്ചു.
താങ്ക്സ്ഗിവിങ് വാരാന്ത്യത്തിന്‍റെ തുടക്കത്തിൽ തെക്കൻ ഒൻ്റാരിയോ, ക്യുബെക്ക് മേഖലകളിൽ ശക്തമായ ഇടിയോടു കൂടിയ മഴ പ്രതീക്ഷിക്കുന്നു. ടൊറൻ്റോ, മോൺട്രിയൽ, ക്യുബെക്ക് സിറ്റി എന്നിവിടങ്ങളിൽ താപനില കുറയും. പ്രെയ്‌റി പ്രവിശ്യകളിലും ബ്രിട്ടിഷ് കൊളംബിയയിലും (B.C.) തണുപ്പേറിയ കാലാവസ്ഥ അനുഭവപ്പെടും. എഡ്മിന്‍റൻ , കാൽഗറി, ഗ്രാൻഡ് പ്രെയ്‌റി എന്നിവിടങ്ങളിലും തെക്കൻ ആൽബർട്ടയുടെ മിക്ക ഭാഗങ്ങളിലും വെള്ളിയാഴ്ചയും ശനിയാഴ്ചയും മണിക്കൂറിൽ 30 കിലോമീറ്റർ വേഗത്തിൽ കാറ്റും ഒപ്പം മഴയും മഞ്ഞുവീഴ്ചയും പ്രതീക്ഷിക്കുന്നു.
