പാനൂർ ചമ്പാട് മീത്തലെ മനയത്ത് വയലിൽ ഹനീഫയുടെ പറമ്പിൽനിന്ന് യാതൊരു മുന്നറിയിപ്പുമില്ലാതെ മണ്ണിനടിയിൽനിന്ന് വെള്ളം റോഡിലേക്ക് കുത്തിയൊഴുകിയത് പ്രദേശവാസികളിൽ കൗതുകവും ഒപ്പം വലിയ ആശങ്കയും ഉണ്ടാക്കിയിട്ടുണ്ട്. ഇന്നലെ ഉച്ചകഴിഞ്ഞ് രണ്ടുമണിയോടെയാണ് ഈ പ്രതിഭാസം ആരംഭിച്ചത്.

ഈ സ്ഥലത്ത് വീടുകളോ, കിണറുകളോ, കുഴൽക്കിണറുകളോ ഇല്ലെന്നതും ഇതിലൂടെ പൈപ്പ്‌ലൈനുകൾ ഒന്നും കടന്നുപോകുന്നില്ല എന്നതും സംഭവത്തിന്റെ ദുരൂഹത വർദ്ധിപ്പിക്കുന്നു. തുടർച്ചയായി അഞ്ചു മണിക്കൂറിലേറെ വെള്ളം ഒഴുകിയതിനാൽ, ഭൂഗർഭജലത്തിന്റെ അമിത സമ്മർദ്ദമോ അല്ലെങ്കിൽ മണ്ണിനടിയിൽ പുതിയ ജലസ്രോതസ്സ് രൂപപ്പെട്ടതോ ആകാം കാര്യമെന്നാണ് നാട്ടുകാരുടെ പ്രാഥമിക നിഗമനം.

എങ്കിലും, ഇതിന്റെ കൃത്യമായ കാരണം എന്താണെന്ന് ശാസ്ത്രീയ പരിശോധനയിലൂടെ മാത്രമേ വ്യക്തമാകൂ. സംഭവമറിഞ്ഞ് പന്ന്യന്നൂർ പഞ്ചായത്ത് പ്രസിഡന്റ് എസ്. സ്നേഹ, മെമ്പർമാരായ നസീർ ഇടവലത്ത്, കെ.പി. ലീല എന്നിവർ ഉടൻ തന്നെ സ്ഥലത്തെത്തി സ്ഥിതിഗതികൾ വിലയിരുത്തുകയും, തുടർനടപടികൾക്കായി ജിയോളജി വകുപ്പിനെ വിവരം അറിയിക്കുകയും ചെയ്തിട്ടുണ്ട്