നഗരത്തിലെ കാൽനടയാത്രക്കാരുടെ സുരക്ഷ ഉറപ്പാക്കാൻ പുതിയ ട്രാഫിക് സിഗ്നൽ സംവിധാനവുമായി കാൽഗറി സിറ്റി രംഗത്ത്. കാൽനടയാത്രക്കാരുടെ സുരക്ഷയ്ക്ക് മുൻഗണന നൽകുന്ന അത്യാധുനിക ട്രാഫിക് സിഗ്നൽ സംവിധാനമായ ‘ലീഡിങ് പെഡസ്ട്രിയൻ ഇന്‍റർവെൽ’ കൂടുതൽ സ്ഥലങ്ങളിൽ സ്ഥാപിക്കുമെന്ന് സിറ്റി അധികൃതർ വ്യക്തമാക്കി. ഡ്രൈവർമാർക്ക് കാൽനടയാത്രക്കാരെ കൂടുതൽ വ്യക്തമായി കാണാനും അപകടസാധ്യത ഒഴിവാക്കാനും സാധിക്കുന്ന ഈ സംവിധാനം അപകടങ്ങൾ കുറയ്ക്കുമെന്ന് വിദഗ്ധർ പറയുന്നു. വാഹനങ്ങൾക്ക് പച്ച വെളിച്ചം തെളിയുന്നതിന് മൂന്ന് മുതൽ ഏഴ് സെക്കൻഡ് മുൻപ് കാൽനടയാത്രക്കാർക്ക് റോഡ് മുറിച്ചുകടക്കാനുള്ള സിഗ്നൽ നൽകുന്നതാണ് ഈ സംവിധാനം.
നഗരസഭയുടെ ‘വിഷൻ സീറോ’ ലക്ഷ്യമിടുന്ന അപകടരഹിത റോഡ് ശൃംഖല എന്ന ആശയത്തിന്‍റെ ഭാഗമായി ഘട്ടംഘട്ടമായി കൂടുതൽ തിരക്കേറിയ ജംഗ്ഷനുകളിലേക്ക് ഈ സംവിധാനം നടപ്പിലാക്കാനാണ് കാൽഗറി ഗതാഗത വകുപ്പിൻ്റെ തീരുമാനം. നഗരത്തിൽ കാൽനടയാത്രക്കാർ ഉൾപ്പെട്ട അപകടങ്ങൾ വർധിക്കുന്ന സാഹചര്യത്തിൽ, ഗതാഗത സുരക്ഷാ മാനദണ്ഡങ്ങൾ കർശനമാക്കണമെന്ന ആവശ്യം ശക്തമായിരുന്നു.
