ഇരുരാജ്യങ്ങളും തമ്മിലുള്ള വ്യാപാരയുദ്ധത്തിന്‍റെ ഭാഗമായി, ചില കനേഡിയൻ ഉൽപ്പന്നങ്ങൾക്ക് യുഎസ് ഏർപ്പെടുത്തിയ ഇറക്കുമതി ഉപരോധം ചൊവ്വാഴ്ച പുലർച്ചെ 12:01 മുതൽ നിലവിൽ വരും. കാനഡ പ്രഖ്യാപിച്ച താരിഫുകൾക്ക് പകരമായിട്ടാണ് യുഎസ് പ്രസിഡൻ്റ് ഡോണൾഡ് ട്രംപ് ഈ എക്സിക്യൂട്ടീവ് ഉത്തരവിൽ ഒപ്പുവെച്ചത്. അതേസമയം ഇരു രാജ്യങ്ങളും തമ്മിലുള്ള വ്യാപാര തർക്കങ്ങൾക്ക് ഉടനടി അവസാനമുണ്ടാകാൻ സാധ്യതയില്ലെന്ന് യു.എസ് വ്യാപാര പ്രതിനിധികൾ വ്യക്തമാക്കി.

വിസ്കി, വൈൻ, ബിയർ, ടെക്വില, വോഡ്ക, റം തുടങ്ങിയ പാക്ക് ചെയ്തതും അല്ലാത്തതുമായ എല്ലാ പ്രധാന മദ്യങ്ങളുടെയും ഇറക്കുമതി നിരോധിച്ചിട്ടുണ്ട്. കനേഡിയൻ മദ്യത്തിന്‍റെ പ്രധാന കയറ്റുമതി വിപണിയാണ് യു.എസ്. വേ (whey), വേ പ്രോട്ടീൻ, മറ്റ് പാലുൽപ്പന്നങ്ങൾ എന്നിവയ്ക്ക് പൂർണ്ണ നിരോധനമുണ്ട്. കൂടാതെ കരിമ്പ് മൊളാസസും ഇതിൽ ഉൾപ്പെടുന്നു. 2024-ൽ 70-ലധികം കോടി ഡോളറിന്‍റെ പാലുൽപ്പന്നങ്ങളാണ് കാനഡയിൽ നിന്ന് യു.എസിലേക്ക് കയറ്റുമതി ചെയ്തത്. 800 സി.സിയിൽ കൂടുതൽ എഞ്ചിൻ ശേഷിയുള്ള മോട്ടോർസൈക്കിളുകൾ, മോപ്പെഡുകൾ എന്നിവയും നിരോധിച്ച പട്ടികയിലുണ്ട്.