ഗൾഫിൽ നിന്നും നാട്ടിലേക്ക് പണമയക്കാൻ ഉദ്ദേശിക്കുന്ന പ്രവാസികൾ ജാഗ്രത പാലിക്കേണ്ടതുണ്ട്. ഇന്ത്യയിലെ പൊതുമേഖലാ ബാങ്ക് ജീവനക്കാർ ഈ മാസം 28 മുതൽ 30 വരെ പ്രഖ്യാപിച്ചിരിക്കുന്ന മൂന്നു ദിവസത്തെ പണിമുടക്ക് ഗൾഫിൽ നിന്നുള്ള പണമയക്കലിനെയും ബാങ്കിങ് സേവനങ്ങളെയും ബാധിച്ചേക്കുമെന്ന് ആശങ്കയുണ്ട്. പണിമുടക്ക് നേരിട്ട് ബാധിച്ചില്ലെങ്കിലും, പണം സ്വീകരിക്കുന്ന ബാങ്കുകളുടെ പ്രോസസിംഗ് വൈകാൻ സാധ്യതയുള്ളതിനാൽ അടിയന്തരമായി പണമയക്കുന്നവർ കൂടുതൽ സമയം കണക്കാക്കി വേണം ഇടപാടുകൾ നടത്താൻ.
തുടർച്ചയായ വാരാന്ത്യ അവധിയും പണിമുടക്കും കണക്കിലെടുത്ത്, റിസർവ് ബാങ്കിന്റെ അനുമതിയോടെ എസ്ബിഐ ഉൾപ്പെടെയുള്ള പ്രമുഖ പൊതുമേഖലാ ബാങ്കുകളുടെയും ഗ്രാമീണ ബാങ്കുകളുടെയും ശാഖകൾ ഞായറാഴ്ച (27) തുറന്നു പ്രവർത്തിക്കും. എങ്കിലും സ്വകാര്യ ബാങ്കുകൾക്ക് ഇത് ബാധകമല്ലാത്തതിനാൽ ഇടപാടുകാർ അതത് ബാങ്കുകളുമായി ബന്ധപ്പെടേണ്ടതാണ്. യുണൈറ്റഡ് ഫോറം ഓഫ് ബാങ്ക് യൂണിയൻസിന്റെ (യു.എഫ്.ബി.യു) നേതൃത്വത്തിലാണ് ഈ പണിമുടക്ക് നടക്കുന്നത്.
പണിമുടക്ക് ദിവസങ്ങളിലും യുപിഐ, ഇൻറർനെറ്റ് ബാങ്കിങ്, മൊബൈൽ ബാങ്കിങ് തുടങ്ങിയ ഡിജിറ്റൽ സേവനങ്ങളും എടിഎമ്മുകളും ലഭ്യമാക്കാൻ ലക്ഷ്യമിടുന്നുണ്ട്. കൂടാതെ, 28 മുതൽ 30 വരെയുള്ള ദിവസങ്ങളിൽ മറ്റ് ബാങ്കുകളുടെ എടിഎമ്മുകളിൽ നിന്ന് പണം പിൻവലിക്കുമ്പോൾ ഈടാക്കുന്ന അധിക നിരക്കുകൾ പൊതുമേഖലാ ബാങ്കുകൾ താൽക്കാലികമായി ഒഴിവാക്കിയിട്ടുണ്ട്. 30-ാം തീയതി ബാങ്കുകളുടെ അർധവാർഷിക ക്ലോസിങ് ദിനം കൂടിയായതിനാൽ, പ്രതിസന്ധി രൂക്ഷമാകാതിരിക്കാൻ ശാഖകൾ വഴിയുള്ള അടിയന്തര ബാങ്കിങ് ഇടപാടുകൾ ഞായറാഴ്ച തന്നെ പൂർത്തിയാക്കാൻ പ്രവാസികളും നാട്ടിലെ ബന്ധുക്കളും ശ്രദ്ധിക്കണം.
