യൂറോപ്യൻ യൂണിയന്റെ എക്കാലത്തെയും ആദ്യത്തെ അസോസിയേറ്റ് അംഗമാകാൻ കാനഡയ്ക്ക് അവസരം നൽകാനുള്ള നിർദ്ദേശത്തിനെതിരെ യു.എസ് പ്രസിഡന്റ് ഡൊണാൾഡ് ട്രംപ് രംഗത്ത്. യൂറോപ്യൻ യൂണിയൻ ഈ നീക്കം നടപ്പിലാക്കിയാൽ യൂറോപ്പുമായി വ്യാപാരം നിർത്തലാക്കുമെന്നും കനത്ത താരിഫ് ഏർപ്പെടുത്തുമെന്നും ബുധനാഴ്ച ട്രംപ് ഭീഷണിപ്പെടുത്തി. ട്രംപിന്റെ നേതൃത്വത്തിലുള്ള അമേരിക്കയുടെ ആക്രമണത്മക സമീപനങ്ങളിൽ നിന്ന് അകലം പാലിക്കാൻ കാനഡയും യൂറോപ്യൻ യൂണിയനും ശ്രമിക്കുന്നതിനിടയിലാണ് ഈ സംഭവവികാസം.
ഈ പദ്ധതിയെക്കുറിച്ച് ചോദിച്ചപ്പോൾ “ഇത് പരിഹാസ്യമാണെന്ന് ഞാൻ കരുതുന്നു” എന്നാണ് ട്രംപ് മാധ്യമപ്രവർത്തകരോട് പറഞ്ഞത്. “അവർ അങ്ങനെ ചെയ്യുകയാണെങ്കിൽ, അതൊരു ശത്രുതാപരമായ നടപടിയാണെന്ന് എനിക്ക് തോന്നിയാൽ, ഞാൻ യൂറോപ്പുമായി വ്യാപാരം നിർത്തുതയോ അല്ലെങ്കിൽ പല കാര്യങ്ങളിലും വളരെ ഗൗരവമേറിയ താരിഫുകൾ ഏർപ്പെടുത്തുകയോ ചെയ്യും” എന്ന് അദ്ദേഹം കൂട്ടിച്ചേർത്തു. നല്ല ഉദ്ദേശ്യത്തോടെയാണെങ്കിൽ കുഴപ്പമില്ലെന്നും, മോശമായ ഉദ്ദേശ്യമാണെങ്കിൽ യൂറോപ്പിന് മേൽ കനത്ത താരിഫ് ചുമത്തുമെന്നും അദ്ദേഹം വ്യക്തമാക്കുകയുണ്ടായി.
യൂറോപ്യൻ പാർലമെന്റിൽ കനേഡിയൻ പ്രധാനമന്ത്രി മാർക്ക് കാർണി സംസാരിക്കുന്നതിന് തൊട്ടുമുമ്പ് ഇയു ചീഫ് ഉർസുല വോൺ ഡെർ ലെയ്ൻ ആണ് കാനഡയെ ഇയുവിന്റെ ആദ്യ അസോസിയേറ്റ് അംഗമാക്കാനുള്ള സാധ്യത മുന്നോട്ടുവെച്ചത്. അന്താരാഷ്ട്ര നിയമങ്ങളെ അടിസ്ഥാനമാക്കിയുള്ള സംവിധാനങ്ങളിൽ പ്രതിസന്ധി നേരിടുന്ന ഈ കാലഘട്ടത്തിൽ ബ്രസൽസും ഒട്ടാവയും കൂടുതൽ അടുക്കേണ്ടതുണ്ടെന്ന് അവർ സ്ട്രാസ്ബർഗിൽ വ്യക്തമാക്കി.
അമേരിക്കയുമായുള്ള വ്യാപാരയുദ്ധത്തിൽ കാനഡ കുടുങ്ങിക്കിടക്കുന്ന സാഹചര്യത്തിലാണ് യൂറോപ്യൻ യൂണിയനുമായി കൂടുതൽ അടുക്കാൻ മാർക്ക് കാർണി ശ്രമിക്കുന്നത്. സാങ്കേതികവിദ്യ, പ്രതിരോധം, ഊർജ്ജം എന്നീ മേഖലകളിൽ അടുത്ത സഹകരണം ഉറപ്പാക്കാനും, കാനഡയുമായുള്ള ബന്ധം പരമാവധി ഉയർന്ന തലത്തിലേക്ക് എത്തിക്കാനുമുള്ള ഒരു ‘ഭാവി സഖ്യത്തിന്’ സമയമായെന്ന് വോൺ ഡെർ ലെയ്ൻ പറഞ്ഞു. ആർട്ടിക് മേഖലയെ സംയുക്ത പദ്ധതിയാക്കാനും, നിർമ്മിത ബുദ്ധി (AI), സൈബർ സുരക്ഷ, സാമ്പത്തിക സുരക്ഷ തുടങ്ങിയ മേഖലകളിൽ സഹകരിക്കാനും ഇരുവരും ലക്ഷ്യമിടുന്നു.
എന്നാൽ, നിലവിലുള്ള ഇയു നിയമങ്ങൾ പ്രകാരം “അസോസിയേറ്റ് അംഗം” എന്നൊരു പദവി വിഭാവനം ചെയ്തിട്ടില്ല. മുൻപ് ജർമ്മൻ ചാൻസലർ ഫ്രെഡ്രിക് മെർസ് ഉക്രെയ്നായി ഈ ആശയം മുന്നോട്ടുവെച്ചിരുന്നുവെങ്കിലും അതിന് വ്യക്തമായ പിന്തുണ ലഭിച്ചിരുന്നില്ല. നിലവിൽ കാനഡയും യൂറോപ്യൻ യൂണിയനും തമ്മിൽ സിഇടിഎ (CETA) സ്വതന്ത്ര വ്യാപാര കരാർ ഉൾപ്പെടെയുള്ള ശക്തമായ സഹകരണങ്ങൾ നിലവിലുണ്ട്. ബ്രിട്ടീഷ് പ്രധാനമന്ത്രി ആൻഡി ബർണമുമായുള്ള കൂടിക്കാഴ്ചയ്ക്ക് ശേഷമാണ് മാർക്ക് കാർണി യൂറോപ്യൻ പാർലമെന്റിലെ തന്റെ പ്രസംഗത്തിനായി സ്ട്രാസ്ബർഗിലേക്ക് മടങ്ങിയത്.
