ജലദോഷം, ഇൻഫ്ലുവൻസ സീസൺ അടുത്തെത്തിയതോടെ, ആൽബർട്ട നിവാസികൾക്കുള്ള പ്രതിരോധ കുത്തിവയ്പ്പുകൾക്കുള്ള ബുക്കിങ് അടുത്ത മാസം മുതൽ ആരംഭിക്കും. ഒക്ടോബർ 5 മുതൽ ഓൺലൈനായോ, ‘ഹെൽത്ത് ലിങ്ക്’ (Health Link) സർവീസിൽ 811 എന്ന നമ്പറിൽ വിളിച്ചോ, പ്രാദേശിക ഫാർമസികൾ വഴിയോ ബുക്കിങ് നടത്താം.
12 വയസ്സും അതിൽ കൂടുതലുമുള്ള അർഹരായ ആൽബർട്ട നിവാസികൾക്ക് പൊതുജനാരോഗ്യ ക്ലിനിക്കുകൾ, പദ്ധതിയിൽ പങ്കാളികളാകുന്ന കമ്മ്യൂണിറ്റി ഫാർമസികൾ എന്നിവ വഴി റെസ്പിറേറ്ററി സിൻസിറ്റിയൽ വൈറസ് (RSV), ഇൻഫ്ലുവൻസ, കോവിഡ്-19 എന്നിവയ്ക്കെതിരായ പ്രതിരോധ കുത്തിവയ്പ്പ് സൗജന്യമായി ലഭിക്കും. കോവിഡ്-19 വാക്സിൻ എടുക്കാൻ ആഗ്രഹിക്കുന്ന, 12 വയസ്സും അതിൽ കൂടുതലുമുള്ള മറ്റ് ആൽബർട്ട നിവാസികൾക്ക്, 100 ഡോളർ അടച്ച് ഫാർമസികളിലൂടെ വാക്സിൻ ലഭിക്കുന്നതാണ്. അതേസമയം ആറ് മാസം മുതൽ 11 വയസ്സുവരെയുള്ള കുട്ടികൾക്ക് ‘പ്രൈമറി കെയർ ആൽബർട്ട’യുടെ പൊതുജനാരോഗ്യ ക്ലിനിക്കുകൾ വഴി കോവിഡ്-19 പ്രതിരോധ കുത്തിവയ്പ്പ് സൗജന്യമായി ലഭ്യമാണ്.
