എയർ ട്രാഫിക് കൺട്രോൾ സംവിധാനത്തിലുണ്ടായ സാങ്കേതിക തകരാറിനെ തുടർന്ന് യുകെയിൽ 600 റദ്ദാക്കുകയും നൂറുകണക്കിന് വിമാനങ്ങൾ വൈകുകയും ചെയ്തു. പല പ്രധാന വിമാനത്താവളങ്ങളുടെയും പ്രവർത്തനം തടസ്സപ്പെട്ടു. ഫ്ലൈറ്റ് പോസസിങ് സിസ്റ്റത്തിലാണ് തകരാറെന്നും അത് ശരിയാക്കാനുള്ള പ്രവർത്തനങ്ങൾ അടിയന്തരമായി നടക്കുകയാണെന്നും ബ്രിട്ടീഷ് നാഷനൽ എയർ ട്രാഫിക് സർവീസസ് (എൻഎടിഎസ്) അറിയിച്ചു. ഹീത്രോ, ഗാറ്റ്‌വിക്, മാഞ്ചസ്റ്റർ, സ്റ്റാൻസ്റ്റെഡ് തുടങ്ങിയ വിമാനത്താവളങ്ങളെയാണ് തകരാർ പ്രധാനമായും ബാധിച്ചത്.
ബ്രിട്ടിഷ് എയർവേയ്‌സ്, ഈസിജെറ്റ്, കെ‌എൽ‌എം, ലുഫ്താൻസ എന്നിവയുൾപ്പെടെയുള്ള നിരവധി വിമാനക്കമ്പനികളുടെ വിമാന സർവീസുകളെ ഈ പ്രശ്നം ബാധിച്ചു. യാത്രക്കാർ വിമാനത്തിന്‍റെ നിലവിലെ അവസ്ഥ അതത് വിമാനക്കമ്പനികളുമായി ബന്ധപ്പെട്ട് പരിശോധിക്കണമെന്ന് അധികൃതർ മുന്നറിയിപ്പ് നൽകി.
