ഇംഗ്ലണ്ടിനെതിരായ ലീഡ്സ്, ലോർഡ്സ് ടെസ്റ്റുകളിലേറ്റ തിരിച്ചടിയെ തുടർന്ന് പാക്കിസ്ഥാൻ ക്രിക്കറ്റ് ടീമിലും പരിശീലക സംഘത്തിലും വൻ അഴിച്ചുപണിയുമായി പാക്കിസ്ഥാൻ ക്രിക്കറ്റ് ബോർഡ് (PCB). തോൽവിക്ക് പിന്നാലെ ഏഴ് പ്രമുഖ താരങ്ങളെയും മുഖ്യ പരിശീലകൻ സർഫരാസ് അഹമ്മദ്, ബോളിങ് കോച്ച് ഉമർ ഗുൽ എന്നിവരെയും ടീമിൽ നിന്ന് ഒഴിവാക്കി നാട്ടിലേക്ക് അയച്ചു. അവസാന ടെസ്റ്റിൽ മൈക്ക് ഹെസ്സനായിരിക്കും ടീമിനെ പരിശീലിപ്പിക്കുക. അതേസമയം, പരിക്കിന്റെ പേരിൽ രണ്ടാം ടെസ്റ്റിന്റെ ഇരു ഇന്നിങ്സുകളിലും ബാറ്റിങ്ങിന് ഇറങ്ങാതിരുന്ന ഓപ്പണർ ഇമാം ഉൾ ഹഖിന്റെ പരിക്കിനെക്കുറിച്ച് അന്വേഷിക്കാൻ പിസിബി പ്രത്യേക കമ്മീഷനെ നിയോഗിച്ചിട്ടുണ്ട്. 2022-ലെ ഇംഗ്ലണ്ട് പരമ്പരയ്ക്കിടെയും ഇമാം പരിക്ക് അഭിനയിച്ച് മാറിനിന്നിരുന്നതായി മുൻ സെലക്ടർ മുഹമ്മദ് വാസിം വെളിപ്പെടുത്തിയത് വിവാദം രൂക്ഷമാക്കിയിട്ടുണ്ട്.
ടീമിലെ പെട്ടെന്നുള്ള പൊളിച്ചെഴുത്തിനെ ന്യായീകരിച്ച് സെലക്ടർ ആക്വിബ് ജാവേദ് രംഗത്തെത്തി. തോൽവിക്ക് കാരണം ക്യാപ്റ്റൻ ബാബർ അസമിന്റെയും പരിശീലകൻ സർഫരാസ് അഹമ്മദിന്റെയും തെറ്റായ തീരുമാനങ്ങളാണെന്ന് അദ്ദേഹം വിമർശിച്ചു. ടീമിലെ ഘടനയും പ്ലേയിങ് ഇലവൻ തിരഞ്ഞെടുപ്പും പിഴച്ചെന്നും, ചെറുത്തുനിൽപ്പുപോലുമില്ലാതെ കീഴടങ്ങിയ പാക് ടീമിനെ കണ്ട് ലോകം ചിരിക്കുകയാണെന്നും അദ്ദേഹം പറഞ്ഞു. വേഗതയേറിയ ബോളർ ഉബൈദ് ഷായെയും ഓൾറൗണ്ടർമാരെയും കളിപ്പിക്കണമെന്ന നിർദേശം മാനേജ്മെന്റ് തള്ളിക്കളയുകയായിരുന്നു. പാക്കിസ്ഥാനിലെ യുവതാരങ്ങളുടെ മികവ് തെളിയിക്കാനാണ് പുതിയ കളിക്കാരെ ഇംഗ്ലണ്ടിലേക്ക് അയച്ചതെന്നും അദ്ദേഹം വ്യക്തമാക്കി.
