എഡ്മിന്റൻ നഗരത്തിൽ വാഹനങ്ങളിൽ നിന്നുള്ള കവർച്ച വർധിക്കുന്നതായി പോലീസ് മുന്നറിയിപ്പ് നൽകി. ഒരു മാസത്തിനിടെ നഗരത്തിൽ ഇരുനൂറ്റമ്പതിലധികം വാഹനങ്ങളിൽ കവർച്ച നടന്നതായി എഡ്മിന്റൻ പോലീസ് റിപ്പോർട്ട് ചെയ്തു. വാഹനങ്ങളിൽ സൂക്ഷിച്ചിരുന്ന പേഴ്സുകൾ, തിരിച്ചറിയൽ രേഖകൾ, മറ്റ് വിലപിടിപ്പുള്ള വസ്തുക്കൾ എന്നിവയാണ് പ്രധാനമായും മോഷ്ടാക്കൾ ലക്ഷ്യമിടുന്നത്. എഡ്മിന്റൻ നഗരത്തിലും വെസ്റ്റ് ബ്രാഞ്ച് മേഖലയിലുമായി ആകെ 287 വാഹനങ്ങളിലാണ് മോഷണം നടന്നത്. കഴിഞ്ഞ വർഷത്തെ അപേക്ഷിച്ച് വാഹനങ്ങളിൽ നിന്നുള്ള മോഷണ കേസിൽ 17% വർധന ഉണ്ടായിട്ടുണ്ട്.
മോഷണം വർധിക്കുന്ന സാഹചര്യത്തിൽ വാഹന ഉടമകൾ കൂടുതൽ ജാഗ്രത പാലിക്കണമെന്ന് പോലീസ് നിർദ്ദേശിച്ചു. കാറിൻ്റെ ഡോറുകൾ കൃത്യമായി ലോക്ക് ചെയ്യുകയും വിൻഡോ പൂർണ്ണമായി അടയ്ക്കുകയും ചെയ്യണം. പണം, ഫോൺ, പേഴ്സ് തുടങ്ങിയ വിലപിടിപ്പുള്ള സാധനങ്ങൾ കാറിനുള്ളിൽ പുറത്തു കാണുന്ന രീതിയിൽ വയ്ക്കരുത്. വെളിച്ചമുള്ള സ്ഥലങ്ങളിൽ മാത്രം വാഹനങ്ങൾ പാർക്ക് ചെയ്യാൻ ശ്രദ്ധിക്കണമെന്നും നിർദ്ദേശമുണ്ട്.
