കടുത്ത ചൂടിന് ശേഷം ശൈത്യകാലത്തെ വരവേൽക്കാനൊരുങ്ങി ആൽബർട്ട. സെപ്റ്റംബർ മാസത്തോടെ പ്രവിശ്യയിലുടനീളം താപനില ഗണ്യമായി കുറയുമെന്ന് എൻവയൺമെൻ്റ് കാനഡ റിപ്പോർട്ട് ചെയ്തു. സെപ്റ്റംബറിൻ്റെ തുടക്കത്തിൽ കാൽഗറി, എഡ്മിന്റൻ തുടങ്ങിയ നഗരങ്ങളിൽ പകൽ താപനില 19 ഡിഗ്രി സെൽഷ്യസ് മുതൽ 20 ഡിഗ്രി സെൽഷ്യസ് വരെയായി തുടരും. എന്നാൽ, മാസത്തിൻ്റെ രണ്ടാം പകുതിയിൽ രാത്രി താപനില അഞ്ച് ഡിഗ്രി സെൽഷ്യസ് വരെയായി കുറയുമെന്ന് കാലാവസ്ഥാ വകുപ്പ് അറിയിച്ചു. പ്രവിശ്യയുടെ തെക്കൻ മേഖലകളിൽ ചില ദിവസങ്ങളിൽ നേരിയ ചൂട് തുടരുമെങ്കിലും, വടക്കൻ പ്രദേശങ്ങളിൽ തണുത്ത കാറ്റും മേഘാവൃതമായ അന്തരീക്ഷവും അനുഭവപ്പെടും.
അതേസമയം ഉച്ചകഴിഞ്ഞ് ചാറ്റൽ മഴയ്ക്കും നേരിയ മഞ്ഞുവീഴ്ചയ്ക്കും സാധ്യതയുണ്ട്. താപനിലയിൽ പെട്ടെന്നുണ്ടാകുന്ന ഈ വ്യതിയാനം ജനജീവിതത്തെ ബാധിക്കാതിരിക്കാൻ ആവശ്യമായ മുൻകരുതലുകൾ സ്വീകരിക്കണമെന്ന് കാലാവസ്ഥാ വകുപ്പ് നിർദ്ദേശിച്ചു.
