ഇന്ത്യ പ്രസ് ക്ലബ് ഓഫ് നോർത്ത് അമേരിക്ക (ഐ.പി.സി.എൻ.എ) ഡാളസ് ചാപ്റ്ററിന്റെ 2026-ലെ പ്രവർത്തനങ്ങൾക്ക് ഓഗസ്റ്റ് 23-ന് ഔദ്യോഗികമായി തുടക്കമാകുന്നു. വിൻധാം ഡി.എഫ്.ഡബ്ല്യു എയർപോർട്ട് ഹോട്ടലിൽ വെച്ച് നടക്കുന്ന പ്രൗഢഗംഭീരമായ ചടങ്ങിൽ കോട്ടയം എം.പി കെ. ഫ്രാൻസിസ് ജോർജ് ഉദ്ഘാടനം നിർവ്വഹിക്കും. പ്രശസ്ത സിനിമാ താരം ദിവ്യ ഉണ്ണിയും ചടങ്ങിൽ വിശിഷ്ടാതിഥിയായി വേദി പങ്കിടും. സാംസ്കാരിക-സാമൂഹിക രംഗങ്ങളിലെ പ്രമുഖരും മാധ്യമപ്രവർത്തകരും ജനപ്രതിനിധികളും ഒത്തുചേരുന്ന ഈ സമ്മേളനം ഡാളസിലെ മലയാളി സമൂഹത്തിന് വേറിട്ടൊരു അനുഭവമായിരിക്കും. ഷിജു എബ്രഹാം (ഷിജു ഫൈനാൻഷ്യൽസ്), സോബിൻ മാത്യു (ക്രൗൺ ട്രാവൽസ് & ത്രിവേണി ഇന്ത്യൻ സൂപ്പർ മാർക്കറ്റ് ആൻഡ് കിച്ചൺ) എന്നിവരാണ് പരിപാടിയുടെ സ്പോൺസർമാർ.
വേൾഡ് മലയാളി കൗൺസിൽ 15-ാമത് ഗ്ലോബൽ സമ്മേളനത്തിന്റെ ഭാഗമായി നടക്കുന്ന ഈ ചടങ്ങിൽ വരാനിരിക്കുന്ന ദേശീയ സമ്മേളനത്തിന്റെ പ്രാഥമിക വിവരങ്ങളും പുതിയ മാധ്യമ-സാമൂഹിക ക്ഷേമ പദ്ധതികളും പ്രഖ്യാപിക്കും. അമേരിക്കൻ മലയാളി കൂട്ടായ്മകളെ കൂടുതൽ സുദൃഢമാക്കാനും വരുംകാല പ്രവർത്തനങ്ങൾക്ക് വ്യക്തമായ ദിശാബോധം നൽകാനും ഈ കൂട്ടായ്മ സഹായിക്കുമെന്ന് ഭാരവാഹികൾ വ്യക്തമാക്കി. സജി സ്റ്റാർലൈൻ (പ്രസിഡന്റ്), ജോസ് പ്ലാക്കാട്ട് (വൈസ് പ്രസിഡന്റ്), സുധ പ്ലാക്കാട്ട് (സെക്രട്ടറി), മാർട്ടിൻ വിലങ്ങോലിൽ (ജോയിന്റ് സെക്രട്ടറി), തോമസ് കോശി (ട്രഷറർ) എന്നിവരടങ്ങുന്ന സമിതിയാണ് ഡാളസ് ചാപ്റ്ററിന്റെ പ്രവർത്തനങ്ങൾക്ക് നേതൃത്വം നൽകുന്നത്.
