കാനഡയിൽ നിന്നുള്ള യുഎസ് വീസ അപേക്ഷകർക്ക് പുതിയ ഫാസ്റ്റ് ട്രാക്ക് സംവിധാനം ഒരുക്കി യുണൈറ്റഡ് സ്റ്റേറ്റ്സ് ഡിപ്പാർട്ട്മെൻ്റ് ഓഫ് സ്റ്റേറ്റ്. വീസ ഇന്റർവ്യൂ വേഗത്തിലാക്കുന്നതിനായി യുഎസ് എംബസിയിലും കാനഡയിലെ എല്ലാ യുഎസ് കോൺസുലേറ്റുകളിലും പണമടച്ചുള്ള യുഎസ് വീസ അപ്പോയിൻ്റമെൻ്റ് ഓപ്ഷൻ ആരംഭിച്ചതായി യുണൈറ്റഡ് സ്റ്റേറ്റ്സ് ഡിപ്പാർട്ട്മെൻ്റ് ഓഫ് സ്റ്റേറ്റ് അറിയിച്ചു. ഓഗസ്റ്റ് 18 മുതൽ ആരംഭിച്ച ഈ പൈലറ്റ് പ്രോഗ്രാം ഡിസംബർ 31 വരെ തുടരും. മെക്സിക്കോ, കൊളംബിയ, ഗ്വാട്ടിമാല, കോസ്റ്റാറിക്ക, ഹോണ്ടുറാസ് എന്നീ രാജ്യങ്ങളിലും സമാനമായ പൈലറ്റ് പ്രോഗ്രാമിന് തുടക്കമിട്ടിട്ടുണ്ട്. സാധാരണ വീസ അപ്പോയിന്റ്മെൻ്റുകൾക്ക് മാസങ്ങളോളം കാത്തിരിക്കേണ്ടി വരുന്ന സാഹചര്യത്തിൽ, കാനഡയിൽ നിന്നും യുഎസിലേക്ക് അടിയന്തിരമായി യാത്ര ചെയ്യേണ്ടവർക്ക് ഈ പുതിയ ഫാസ്റ്റ് ട്രാക്ക് സംവിധാനം വലിയ സഹായമാകും.
ടൂറിസ്റ്റ്, ബിസിനസ് ആവശ്യങ്ങൾക്കായുള്ള B-1, B-2 വീസ അപേക്ഷകർക്ക് നിലവിലെ 185 യു.എസ് ഡോളർ അപേക്ഷാ ഫീസിന് പുറമെ 750 യു.എസ് ഡോളർ അധികമായി നൽകിയാൽ 10 പ്രവൃത്തി ദിവസത്തിനുള്ളിൽ വീസ ഇന്റർവ്യൂ സ്ലോട്ട് സ്വന്തമാക്കാം. ആദ്യം DS-160 ഫാം പൂരിപ്പിച്ച് സമർപ്പിച്ച ശേഷം regular 185 ഡോളർ ഫീസടച്ച് സാധാ അപ്പോയിന്റ്മെൻ്റ് ബുക്ക് ചെയ്യണം. തുടർന്ന് ഓൺലൈൻ അക്കൗണ്ടിൽ പ്രവേശിച്ച് Request Expedite എന്നതിലെ Paid Expedite ഓപ്ഷൻ വഴി ലഭ്യമായ സ്ലോട്ട് തിരഞ്ഞെടുക്കാം. സ്ലോട്ട് തിരഞ്ഞെടുത്താൽ 10 മിനിറ്റിനുള്ളിൽ 750 ഡോളർ ഫീസ് അടച്ചു ബുക്കിങ് പൂർത്തിയാക്കണം.
