നോർത്ത് ടെക്സസിൽ കടുത്ത ഉഷ്ണതരംഗം തുടരുന്ന പശ്ചാത്തലത്തിൽ കാലാവസ്ഥാ നിരീക്ഷണ കേന്ദ്രം പ്രദേശത്ത് അതീവ ജാഗ്രതാ നിർദ്ദേശം നീട്ടി. ഡാലസ്-ഫോർട്ട് വർത്ത് മേഖലകളിൽ താപനില 41.1 ഡിഗ്രി സെൽഷ്യസായി ഉയരാൻ സാധ്യതയുണ്ട്. ഈ ആഴ്ച മുഴുവനും വാരാന്ത്യത്തിലും താപനില 37.7 ഡിഗ്രിക്ക് മുകളിൽ തുടരും. രാത്രിയിലും കനത്ത ചൂട് തുടരുമെന്നും കാലാവസ്ഥാ വകുപ്പ് മുന്നറിയിപ്പ് നൽകി.
കടുത്ത വരണ്ട കാലാവസ്ഥയും ഉയർന്ന ചൂടും കാരണം പ്രദേശത്ത് കാട്ടുതീ ഉണ്ടാകാനുള്ള അപകടസാധ്യത നിലനിൽക്കുന്നുണ്ട്. ഉയർന്ന മർദ്ദത്തിന്‍റെ സ്വാധീനം മൂലം ഈ ആഴ്ച മഴ ലഭിക്കാൻ സാധ്യതയില്ല. ഈ മാസം അവസാനം വരെ കടുത്ത ചൂട് തുടരുമെന്നാണ് കാലാവസ്ഥാ പ്രവചനം.
