അത്യധികം നൈപുധ്യമുള്ള വിദേശ തൊഴിലാളികൾക്കുള്ള പുതിയ H-1B വിസകൾക്ക് 1,00000 ഡോളർ ഫീ ഈടാക്കാനുള്ള നീക്കം ഫെഡറൽ അപ്പീൽ കോടതി തള്ളിയതോടെ യു.എസ് പ്രസിഡന്റ് ഡൊണാൾഡ് ട്രംപിന്റെ ഭരണകൂടത്തിന് വൻ തിരിച്ചടി നേരിട്ടു.

അമേരിക്കക്കാർക്ക് പകരം വിദേശ തൊഴിലാളികളെ കമ്പനികൾ ജോലിക്ക് എടുക്കുന്നത് തടയാനാണ് H-1B വിസ ഫീസിൽ വൻ വർദ്ധനവ് ട്രംപ് ഭരണകൂടം പ്രഖ്യാപിച്ചത്. എന്നാൽ, 20 ഡെമോക്രാറ്റിക് സംസ്ഥാനങ്ങൾ നൽകിയ ഹർജിയെ തുടർന്ന് താഴത്തെ കോടതി പുറപ്പെടുവിച്ച ജൂൺ 8-ലെ വിധി തടയാൻ ബോസ്റ്റൺ അധിഷ്ഠിത 1st യു.എസ് സർക്യൂട്ട് കോർട്ട് ഓഫ് അപ്പീൽസ് വിസമ്മതിച്ചു. കോൺഗ്രസ് അനുമതി നൽകാത്ത ഈ ഫീ നിയമവിരുദ്ധമായ ഒരു നികുതിക്ക് തുല്യമാണെന്ന് കോടതി നിരീക്ഷിച്ചു.

എക്സിക്യൂട്ടീവ് വിഭാഗം തങ്ങളുടെ അധികാരം ലംഘിക്കുകയും ‘അഡ്മിനിസ്ട്രേറ്റീവ് പ്രൊസീജർ ആക്ട്’ ലംഘിക്കുകയും ചെയ്തതായി യു.എസ് ഡിസ്ട്രിക്റ്റ് കോർട്ട് ജഡ്ജി ലിയോ സൊറോക്കിൻ ചൂണ്ടിക്കാട്ടി.

എന്താണ് H-1B വിസ പ്രോഗ്രാം?

യോഗ്യതയുള്ള അമേരിക്കൻ ജീവനക്കാരെ കണ്ടെത്താൻ യു.എസ് തൊഴിൽദായകർ ബുദ്ധിമുട്ടുന്ന മേഖലകളിൽ, അത്യധികം നൈപുധ്യമുള്ള വിദേശ തൊഴിലാളികൾക്കായി ഉദ്ദേശിച്ചുള്ളതാണ് H-1B വിസകൾ. ഈ പ്രോഗ്രാം വഴി പ്രതിവർഷം 65,000 വിസകളും, യു.എസിൽ നിന്ന് ഉന്നത ബിരുദം നേടിയ അപേക്ഷകർക്ക് അധികമായി 20,000 വിസകളും നൽകുന്നുണ്ട്. തിരഞ്ഞെടുക്കപ്പെടുന്ന അപേക്ഷകർക്ക് യു.എസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (USCIS) സാധാരണയായി മൂന്ന് മുതൽ ആറ് വർഷം വരെ കാലാവധിയുള്ള വിസകളാണ് അനുവദിക്കുന്നത്.

ട്രംപിന്റെ ഫീ വർദ്ധന നിർദ്ദേശത്തിന് മുൻപ്, H-1B തൊഴിലാളികളെ സ്പോൺസർ ചെയ്യുന്ന തൊഴിൽദായകർ പല ഘടകങ്ങളെ അടിസ്ഥാനമാക്കി 2,000 മുതൽ 5,000 ഡോളർ വരെയാണ് ഗവൺമെന്റ് ഫയലിംഗ് ഫീസായി നൽകിയിരുന്നത്.

ഫീ വർദ്ധനവിനെ ന്യായീകരിച്ച ട്രംപ്, കുറഞ്ഞ വേതനമുള്ളവരും കുറഞ്ഞ നൈപുധ്യമുള്ളതുമായ തൊഴിലാളികളെ ഉപയോഗിച്ച് അമേരിക്കൻ ജീവനക്കാർക്ക് പകരക്കാരെ കണ്ടെത്താനാണ് H-1B പ്രോഗ്രാം ദുരുപയോഗം ചെയ്യുന്നതെന്ന് വാദിച്ചിരുന്നു.

ഇത് ആരെയാണ് ബാധിക്കുമായിരുന്നത്?

റോയിട്ടേഴ്സ് റിപ്പോർട്ട് പ്രകാരം, സ്റ്റുഡന്റ് വിസയിൽ അമേരിക്കയിൽ കഴിയുന്ന വിദേശികളെ ഈ 1,00000 ഡോളർ ഫീ ബാധിക്കുമായിരുന്നില്ല. പുതിയ H-1B വിസ ലഭിക്കുന്നവരിൽ വലിയൊരു പങ്കും ഇത്തരക്കാരാണ്.

2025 സെപ്റ്റംബറിൽ പ്രഖ്യാപിച്ച ഈ നയം പുതിയ H-1B ഹർജികളുടെ എണ്ണത്തിൽ വലിയ കുറവുണ്ടാക്കിയതായി ബ്ലൂംബെർഗ് റിപ്പോർട്ട് ചെയ്തു. പുതിയ ഫീ ഘടന പ്രകാരം ഫെബ്രുവരി പകുതിയോടെ വളരെ കുറച്ച് പേയ്മെന്റുകൾ മാത്രമേ ലഭിച്ചിട്ടുള്ളൂ എന്ന് കോടതി രേഖകൾ വ്യക്തമാക്കുന്നു.

വിധിയെ സ്വാഗതം ചെയ്ത് സംസ്ഥാനങ്ങൾ

അപ്പീൽ കോടതിയുടെ തീരുമാനത്തെ മസാച്യുസെറ്റ്സ് അറ്റോർണി ജനറൽ ആൻഡ്രിയ ജോയ് കാംബെൽ സ്വാഗതം ചെയ്തു. അത്യധികം നൈപുധ്യമുള്ള വിദേശ തൊഴിലാളികളെ ആശ്രയിക്കുന്ന തൊഴിൽദായകർക്ക് ലഭിച്ച വിജയമാണിതെന്ന് അവർ വിശേഷിപ്പിച്ചു.

“വിദ്യാഭ്യാസം, ആരോഗ്യ സംരക്ഷണം, മെഡിക്കൽ ഗവേഷണം തുടങ്ങിയ പ്രധാന മേഖലകളിലെ കടുത്ത തൊഴിലാളി ക്ഷാമം പരിഹരിക്കാനുള്ള ഒരു മാർഗ്ഗമെന്ന നിലയിൽ H-1B വിസ പ്രോഗ്രാമിന്റെ സുതാര്യത സംരക്ഷിക്കാൻ ഇന്നത്തെ വിജയം സഹായിക്കും,” കാംബെൽ പറഞ്ഞു.

സംസ്ഥാനത്തുടനീളമുള്ള കോളേജുകളിലും സർവ്വകലാശാലകളിലും ലോകോത്തര അധ്യാപകരെയും ഗവേഷകരെയും ജോലിക്ക് എടുക്കുന്നതിനും, ഒഴിവുകൾ നികത്തുന്നതിനും ഈ വിധി മസാച്യുസെറ്റ്സിനെ സഹായിക്കുമെന്നും അവർ കൂട്ടിച്ചേർത്തു.