ഒക്ടോബറിൽ നടക്കാനിരിക്കുന്ന റഫറണ്ടത്തിൽ പോസ്റ്റൽ വോട്ടിനുള്ള (മെയിൽ-ഇൻ ബാലറ്റ്) ഓൺലൈൻ അപേക്ഷകൾ ആൽബർട്ട തിരഞ്ഞെടുപ്പ് കമ്മീഷൻ സ്വീകരിച്ചു തുടങ്ങി. ഒക്ടോബർ 19-ന് നടക്കുന്ന റഫറണ്ടത്തിൽ 10 ചോദ്യങ്ങളാണ് ഉൾപ്പെടുത്തിയിരിക്കുന്നത്. ആൽബർട്ട കാനഡയിൽ തന്നെ തുടരണമോ അതോ വേർപിരിയുന്നതിനായി രണ്ടാമതൊരു വോട്ടെടുപ്പ് നടത്തണമോ എന്ന നിർണായക ചോദ്യവും ഇതിൽ ഉൾപ്പെടുന്നു. കൂടാതെ ഭരണഘടനാ മാറ്റങ്ങൾ, കുടിയേറ്റ പരിഷ്കരണങ്ങൾ എന്നിവയെക്കുറിച്ചും ജനങ്ങളുടെ അഭിപ്രായം തേടും.

ഒക്ടോബർ 9 വരെ പോസ്റ്റൽ വോട്ടിനായി അപേക്ഷിക്കാം. തിരിച്ചറിയൽ രേഖയുടെ പകർപ്പ് സഹിതം ഒക്ടോബർ 16-നകം വോട്ട് ചെയ്ത ബാലറ്റുകൾ തിരിച്ചയക്കണം. ഒക്ടോബർ 13 മുതൽ 17 വരെ പ്രവിശ്യയിലുടനീളമുള്ള മുൻ‌കൂർ വോട്ടിങ് നടക്കും. റഫറണ്ടം സുഗമമായി നടത്തുന്നതിന് 60,000 താൽക്കാലിക ജീവനക്കാരെ നിയമിക്കുമെന്ന് ഇലക്ഷൻസ് ആൽബർട്ട അറിയിച്ചു. ഇതിനായി 22,000-ത്തോളം അപേക്ഷകൾ ലഭിച്ചിട്ടുണ്ടെന്നും ഏജൻസി റിപ്പോർട്ട് ചെയ്തു.