ആമസോൺ വെബ് സർവീസ് (AWS) ഉപയോഗിക്കുന്ന ഒരു വ്യക്തി തന്റെ അക്കൗണ്ടിൽ ലോഗിൻ ചെയ്തപ്പോൾ കണ്ടത് താൻ 1.5 ലക്ഷം കോടി ഡോളറിന്റെ കടക്കാരനായി മാറിയെന്ന വിവരമാണ്. ഒറ്റയടിക്ക് ഇത്രയും ഭീമമായ തുക കണ്ടപ്പോൾ ഞെട്ടിപ്പോയത് ഈ ഉപയോക്താവ് മാത്രമായിരുന്നില്ല. ലോകത്തിന്റെ വിവിധ ഭാഗങ്ങളിലുള്ള ആയിരക്കണക്കിന് ആളുകൾക്ക് സമാനമായ രീതിയിൽ കോടിക്കണക്കിന് ഡോളറിന്റെ വ്യാജ ബില്ലുകൾ വരികയും ഇത് വലിയതോതിൽ ആളുകളെ ഭയപ്പെടുത്തുകയും ചെയ്തു.
ഭരത് എന്ന മലയാളി/ഇന്ത്യക്കാരൻ തന്റെ സോഷ്യൽ മീഡിയ അക്കൗണ്ടായ എക്സിൽ പങ്കുവെച്ച സ്ക്രീൻഷോട്ട് അനുസരിച്ച്, അദ്ദേഹത്തിന്റെ പ്രതിമാസ ബിൽ 1.5 ട്രില്യൺ ഡോളർ (ഏകദേശം 1,44,30,000 കോടി രൂപ) ആയിരുന്നു. മുൻ മാസങ്ങളെ അപേക്ഷിച്ച് ഉപയോഗത്തിൽ യാതൊരു മാറ്റവും വരാതിരുന്നിട്ടും ചെലവിൽ 744,728,201,771 ശതമാനം വർധനവാണ് കാണിച്ചത്. ഇത് കണ്ടപ്പോൾ തന്റെ ബോധം പോകുന്ന അവസ്ഥയായെന്നാണ് ഭരത് കുറിച്ചത്.
ഇന്ത്യക്ക് പുറമെ യുകെ, യുഎസ്, യൂറോപ്പ് തുടങ്ങിയ രാജ്യങ്ങളിലെ വിദ്യാർത്ഥികൾ, ഡെവലപ്പർമാർ, ചെറുകിട സംരംഭകർ എന്നിവരെയും ഈ സാങ്കേതിക തകരാർ ബാധിച്ചു. സാധാരണ 1.28 ഡോളർ മാത്രം വന്നിരുന്ന ഡൽഹിയിലെ സച്ചിൻ എന്ന വിദ്യാർത്ഥിയുടെ ബിൽ 10.9 ബില്യൺ ഡോളറായി കുതിച്ചുയർന്നു. മുൻമാസം വെറും 43 സെന്റ് മാത്രം അടച്ച യുകെയിലെ ഡാൻ ഹാർവിക്ക് ലഭിച്ചത് 7.8 ബില്യൺ ഡോളറിന്റെ ബില്ലാണ്; ഇത് കണ്ട് തനിക്ക് ഹൃദയാഘാതം വരുന്ന അവസ്ഥയായിരുന്നുവെന്ന് അദ്ദേഹം വ്യക്തമാക്കി. റെഡ്ഡിറ്റിലെ ചില ഉപയോക്താക്കൾക്ക് 7 ട്രില്യൺ ഡോളറിന് മുകളിലുള്ള ബില്ലുകളാണ് ലഭിച്ചത്.
സംഭവം വൻ വിവാദമായതോടെ വിശദീകരണവുമായി ആമസോൺ രംഗത്തുവന്നു. ഇതൊരു സാങ്കേതിക തകരാർ മാത്രമാണെന്നും യഥാർത്ഥ ബില്ലല്ലെന്നും കമ്പനി അറിയിച്ചു. ബില്ലിംഗ് സംവിധാനത്തിലെ ‘യൂണിറ്റ് കൺവേർഷൻ ഡാറ്റ’ അപ്ഡേറ്റ് ചെയ്തപ്പോൾ സംഭവിച്ച ഒരു കോൺഫിഗറേഷൻ പിഴവാണ് തെറ്റായ നോട്ടിഫിക്കേഷനുകൾക്കും ഭീമമായ എസ്റ്റിമേറ്റുകൾക്കും കാരണമായത്. ഇത് ഉപയോക്താക്കളുടെ യഥാർത്ഥ ഇൻവോയ്സുകളെ ബാധിച്ചിട്ടില്ലെന്നും, രണ്ട് ദിവസത്തെ പരിശ്രമത്തിനൊടുവിൽ തകരാർ പൂർണ്ണമായും പരിഹരിച്ചതായും ആമസോൺ വ്യക്തമാക്കി.
