ടൊറൻ്റോയിലും പരിസര പ്രദേശങ്ങളിലും തിങ്കളാഴ്ച മുതൽ വീണ്ടും കടുത്ത ചൂട് അനുഭവപ്പെടുമെന്ന് എൻവയൺമെൻ്റ് കാനഡ മുന്നറിയിപ്പ് നൽകി. താപനില 30 മുതൽ 36 ഡിഗ്രി സെൽഷ്യസ് വരെ ഉയരും. എന്നാൽ ഈർപ്പത്തിനൊപ്പം താപനില 38 മുതൽ 45 ഡിഗ്രി സെൽഷ്യസ് വരെയായി അനുഭവപ്പെടുമെന്നും ദേശീയ കാലാവസ്ഥാ ഏജൻസി പ്രവചിക്കുന്നു. ബുധനാഴ്ച അല്ലെങ്കിൽ വ്യാഴാഴ്ച വൈകുന്നേരം വരെ ചൂടും ഈർപ്പവും അനുഭവപ്പെടുമെന്ന് പ്രതീക്ഷിക്കുന്നു. ടൊറൻ്റോ, പിക്കറിങ്, ഓഷവ, വോൺ, റിച്ച്മണ്ട് ഹിൽ, മാർക്കം, പീൽ, ഹാൽട്ടൺ, ഹാമിൽട്ടൺ, നയാഗ്ര എന്നിവിടങ്ങളിൽ മുന്നറിയിപ്പ് ബാധകമായിരിക്കും. ചൊവ്വാഴ്ച ആയിരിക്കും ഏറ്റവും കൂടുതൽ ചൂട് അനുഭവപ്പെടുക. ചില പ്രദേശങ്ങളിൽ പരമാവധി താപനില 36 ഡിഗ്രി സെൽഷ്യസിനടുത്ത് എത്തുമെന്ന് പ്രതീക്ഷിക്കുന്നു, കാലാവസ്ഥാ വകുപ്പ് മുന്നറിയിപ്പ് നൽകി.
കടുത്ത ചൂടിനെ നേരിടാൻ ജൂലൈ 13 തിങ്കളാഴ്ച ഉച്ചയ്ക്ക് 24 മണി മുതൽ നാല് മൊബൈൽ വാട്ടർ ട്രെയിലറുകൾ ലഭ്യമാക്കുമെന്ന് ടൊറൻ്റോ സിറ്റി അറിയിച്ചു. നഥാൻ ഫിലിപ്സ് സ്ക്വയർ, മെൽ ലാസ്റ്റ്മാൻ സ്ക്വയർ, ഈസ്റ്റ് യോർക്ക് സിവിക് സെന്‍റർ, ബാർബറ ഹാൾ പാർക്ക് എന്നിവിടങ്ങളിൽ വാട്ടർ ഫൗണ്ടനുകളും ബോട്ടിൽ ഫില്ലിംഗ് സ്റ്റേഷനുകളും ഒരുക്കിയിട്ടുണ്ട്. സ്കാർബറോ, എറ്റോബിക്കോക്ക്, യോർക്ക്, ഈസ്റ്റ് യോർക്ക് സിവിക് സെന്‍ററുകളിലും മെട്രോ ഹാളിലും രാവിലെ 8 മുതൽ രാത്രി 9:30 വരെ കൂൾ സ്പേസുകളും ഒരുക്കിയിട്ടുണ്ട്.
